ខេត្តរតនគិរី៖ ឪពុកម្តាយទៅចំការឆ្ងាយអស់ ដោយទុកឲ្យកូនស្រីអាយុ២ឆ្នាំនៅផ្ទះ បណ្តាលឲ្យលង់ទឹកស្រះស្លាប់យ៉ាងអាណោចអាធ័ម កាលពីវេលាម៉ោង៣ រសៀលថ្ងៃទី១៨ ខែកញ្ញាឆ្នាំ២០១៦ នៅចំណុចចំការ ស្ថិតនៅក្នុងភូមិចាអ៊ុងកៅ ឃុំចាអ៊ុង ស្រុកអូរជុំ ខេត្តរតនគិរី។

សមត្ថកិច្ចមូលដ្ឋានបានឲ្យដឹងថា ក្មេងស្រីរងគ្រោះឈ្មោះ ហល់ ណាងពឺល អាយុ២ឆ្នាំកន្លះ មានឪពុកឈ្មោះ បា្លយ ហល់ អាយុ២៧ឆ្នាំជនជាតិគ្រឹង និងម្តាយឈ្មោះ ស្មាត គង់ អាយុ៣៦ឆ្នាំ ជនជាតិគ្រឹង។

សមត្ថកិច្ចបានឲ្យដឹងទៀតថា មូលហេតុគឺឪពុកទៅព្រៃ ម្តាយទៅចំការទុកកូនស្រីនៅផ្ទះ ហើយក្មេងស្រីបានចុះទៅលេងទឹកស្រះបណ្តាលឲ្យលង់ស្លាប់តែម្តង។ ក្រោយពីទទួលបានដំណឹងពីមេភូមិនៅរសៀលម៉ោង២ថ្ងៃទី១៩ ខែកញ្ញា ឆ្នាំ២០១៦ កម្លាំងប៉ុស្តិ៍ចាអ៊ុង ក៏បានចុះទៅដល់កន្លែងកើតហេតុពិនិត្យឃើញថា ក្មេងរងគ្រោះពិតជាលង់ទឹកស្រះស្លាប់ ពិតប្រាកដមែន។

ក្រោយពិនិត្យសពរួចបានប្រគល់ឲ្យទៅក្រុមគ្រួសារយកទៅចាត់ចែងធ្វើបុណ្យតាមប្រពៃណី ៕

ដោយ៖ វុទ្ធ ឦសាន