ខេត្តកំពង់ឆ្នាំង ៖ សត្វគោចំនួន ១១ក្បាល ក្នុងហ្វូងគោ១២ក្បាល ត្រូវបានរន្ទះបាញ់បណ្ដាលឱ្យងាប់ ក្នុងពេលដែលមេឃកំពុងភ្លៀង ពេលពួកវាចូលទៅជ្រកក្រោមដើមលាប។ ហេតុការណ៍នេះបានកើតឡើងនៅវេលាម៉ោង ៥និង២០ នាទី ល្ងាចថ្ងៃទី ២៣ខែខែឧសភា ឆ្នាំ២០២៦ នៅចំណុចកោះធំ ស្ថិតនៅក្នុងភូមិចានត្រត ឃុំក្រាំងស្គា ស្រុកទឹកផុស ខេត្តកំពង់ឆ្នាំង។
យោងតាមរបាយការណ៍របស់នគរបាលមូលដ្ឋានបានបញ្ជាក់ថានៅមុនពេលកើតហេតុមានភ្លៀងធ្លាក់មួយមេ ពេលនោះគោមួយហ្វូងបាននាំគ្នា ទៅជ្រកនៅក្រោមដើមលាប ដែលជាកន្លែងពួកវាធ្លាប់ជ្រកពេលក្តៅខ្លាំង និងពេលមានភ្លៀង ព្រោះមានម្លប់យ៉ាងធំ ។ ស្រាប់តែពេលនោះ មានរន្ទះបាញ់បណ្ដាលឱ្យ គោ ១១ ក្បាលត្រូវបានងាប់នៅនឹងកន្លែង និង១ក្បាលទៀតនៅមានជីវិត ។
គោទាំង ១១ ក្បាល មានម្ចាស់ចំនួន ៤នាក់ផ្សេងៗគ្នា ទី១.គោចំនួន ៦ ក្បាល ជារបស់ឈ្មោះ អ៊ូត សូន្យ ភេទស្រី អាយុ៥៦ឆ្នាំ ទី២ គោ១ក្បាលជារបស់ឈ្មោះ ពេជ្រ មួន ភេទប្រុសអាយុ ៧៤ ឆ្នាំ ទី៣ គោ២ក្បាលជារបស់ឈ្មោះ ផាប់ បូណា ភេទស្រី អាយុ៤២ឆ្នាំ និងទី៤. គោ២ក្បាល ជារបស់ឈ្មោះ ផាប់ អៀង ភេទប្រុស អាយុ៤៦ ឆ្នាំ ៕
