តម្លៃប្រេងបានធ្លាក់ចុះ 6% មកកម្រិតទាបបំផុតក្នុងរយៈពេលពីរសប្តាហ៍កាលពីថ្ងៃចន្ទ ខណៈមានសុទិដ្ឋិនិយមកើនឡើងថា សហរដ្ឋអាមេរិក និងអ៊ីរ៉ង់ កំពុងខិតជិតដល់កិច្ចព្រមព្រៀងសន្តិភាព បើទោះបីភាគីទាំងពីរនៅតែមានការខ្វែងគំនិតគ្នាលើបញ្ហាសំខាន់ៗ ដូចជាការបិទច្រកសមុទ្រ Hormuz ក៏ដោយ។

តម្លៃប្រេង Brent crude futures បានធ្លាក់ចុះ 5.85 ដុល្លារ ឬ 5.7% មកនៅត្រឹម 97.69 ដុល្លារក្នុងមួយបារ៉ែល គិតត្រឹមម៉ោង 0343 GMT ខណៈប្រេង U.S. West Texas Intermediate បានធ្លាក់មក 90.85 ដុល្លារក្នុងមួយបារ៉ែល ធ្លាក់ចុះ 5.75 ដុល្លារ ឬ 6%។

កិច្ចសន្យាទាំងពីរបានធ្លាក់ដល់កម្រិតទាបបំផុតចាប់តាំងពីថ្ងៃទី7 ខែឧសភា។

កាលពីថ្ងៃសៅរ៍ ប្រធានាធិបតីអាមេរិក Donald Trump បាននិយាយថា ទីក្រុងវ៉ាស៊ីនតោន និងអ៊ីរ៉ង់ “បានចរចាស្ទើរតែរួចរាល់” លើការយោគយល់គ្នាសម្រាប់កិច្ចព្រមព្រៀងសន្តិភាព ដែលនឹងបើកច្រកសមុទ្រ  Hormuz ឡើងវិញ។ មុនពេលជម្លោះកើតឡើង ច្រកសមុទ្រនេះធ្លាប់ដឹកជញ្ជូនប្រេង និងឧស្ម័ន LNG ប្រហែលមួយភាគប្រាំនៃពិភពលោក។

លោក Saul Kavonic អ្នកវិភាគរបស់ MST Marquee បាននិយាយថា “ទោះបីនៅមានហានិភ័យ និងភាពមិនច្បាស់លាស់ជាច្រើនពាក់ព័ន្ធនឹងកិច្ចព្រមព្រៀងសន្តិភាព និងច្រកសមុទ្រ Hormuz ក៏ដោយ ប៉ុន្តែឥឡូវនេះមានពន្លឺខ្លះនៅចុងផ្លូវ ដែលអាចធ្វើឲ្យតម្លៃប្រេងធូរស្រាលក្នុងរយៈពេលខ្លី”។

ទោះជាយ៉ាងណា ភាគីទាំងពីរនៅតែមានភាពខ្វែងគំនិតលើបញ្ហាពិបាកមួយចំនួន ដោយលោក Trump បាននិយាយកាលពីថ្ងៃអាទិត្យថា លោកបានប្រាប់តំណាងរបស់ខ្លួនមិនឲ្យប្រញាប់ធ្វើកិច្ចព្រមព្រៀងជាមួយអ៊ីរ៉ង់ឡើយ។

លោក Warren Patterson ប្រធានយុទ្ធសាស្ត្រទំនិញប្រើប្រាស់របស់ ING បាននិយាយថា “យើងធ្លាប់ស្ថិតក្នុងដំណាក់កាលបែបនេះមុនមកហើយ ប៉ុន្តែការចរចាបានបរាជ័យនៅទីបញ្ចប់។ ដូច្នេះទីផ្សារទំនងជានឹងប្រុងប្រយ័ត្ន មិនប្រតិកម្មខ្លាំងពេកឡើយ”។

អ្នកវិភាគរំពឹងថា ការត្រឡប់ទៅស្ថានភាពធម្មតានៃការដឹកជញ្ជូនប្រេងតាមច្រកសមុទ្រនេះ អាចចំណាយពេលរាប់ខែ ខណៈហេដ្ឋារចនាសម្ព័ន្ធប្រេង និងឧស្ម័នដែលខូចខាតត្រូវការពេលជួសជុល៕