អន្តរជាតិ៖ ទីបញ្ជាការកណ្តាលសហរដ្ឋអាមេរិក បាននិយាយថា យោធាសហរដ្ឋអាមេរិក បានឲ្យនាវាពាណិជ្ជកម្មចំនួន ១១៨ គ្រឿង ផ្លាស់ប្តូរទិសដៅ និងបានបញ្ឈប់នាវាចំនួន ៥ គ្រឿងផ្សេងទៀត ក្នុងអំឡុងពេលនៃការបិទផ្លូវទឹករបស់សហរដ្ឋអាមេរិកប្រឆាំងអ៊ីរ៉ង់ គិតត្រឹមថ្ងៃអាទិត្យ។
ទីបញ្ជាការបាននិយាយនៅក្នុងការបង្ហោះសារនៅលើវេទិកាបណ្តាញផ្សព្វផ្សាយសង្គម X កាលពីថ្ងៃអាទិត្យថា នាវាពិឃាតរបស់កងទ័ពជើងទឹកសហរដ្ឋអាមេរិក USS Milius (DDG 69) កំពុងជួយគាំទ្រការបិទផ្លូវទឹករបស់សហរដ្ឋអាមេរិកប្រឆាំងនឹងអ៊ីរ៉ង់។ កាលពីថ្ងៃអាទិត្យ កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បាននិយាយថា នាវាចំនួន ២៨ គ្រឿង រួមទាំងនាវាដឹកប្រេង នាវាដឹកទូរទំនិញ និងនាវាពាណិជ្ជកម្ម បានឆ្លងកាត់ច្រកសមុទ្រ Hormuz ក្នុងរយៈពេល ២៤ ម៉ោងកន្លងទៅនេះ បន្ទាប់ពីទទួលបានការអនុញ្ញាត និងទទួលបានការការពារពីកងទ័ពជើងទឹករបស់ខ្លួន។
នៅក្នុងសេចក្តីថ្លែងការណ៍មួយ នៅលើទីភ្នាក់ងារសារព័ត៌មានសាធារណរដ្ឋអ៊ីស្លាមគ្រប់គ្រងដោយរដ្ឋ កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បាននិយាយថា «ការឈ្លានពាន និងសកម្មភាពដ៏គឃ្លើន» របស់យោធាអាមេរិកគឺជាហេតុផលចម្បងនៃភាពអសន្តិសុខនៅលើផ្លូវទឹកនាពេលបច្ចុប្បន្ន ហើយ «ការគ្រប់គ្រងដ៏ឆ្លាតវៃនៅច្រកសមុទ្រ Hormuz របស់អ៊ីរ៉ង់កំពុងត្រូវបានអនុវត្តជាបន្តបន្ទាប់ និងក្នុងសិទ្ធិអំណាច»។
អ៊ីរ៉ង់ បានរឹតបន្តឹងការគ្រប់គ្រងរបស់ខ្លួននៅច្រកសមុទ្រនេះចាប់តាំងពីថ្ងៃទី២៨ ខែកុម្ភៈ ដែលខ្លួនបានហាមឃាត់ការឆ្លងកាត់ដោយសុវត្ថិភាពនៃនាវាជាកម្មសិទ្ធិរបស់ ឬមានទំនាក់ទំនងជាមួយអ៊ីស្រាអែល និងសហរដ្ឋអាមេរិក បន្ទាប់ពីការវាយប្រហាររួមគ្នាទៅលើទឹកដីអ៊ីរ៉ង់។ សហរដ្ឋអាមេរិក បានដាក់ការបិទផ្លូវទឹកនៅច្រកសមុទ្រនេះ ដោយរារាំងនាវាមិនឲ្យឆ្លងកាត់ ទៅនិងមកពីកំពង់ផែអ៊ីរ៉ង់ បន្ទាប់ពីការបរាជ័យក្នុងការចរចារវាងអ៊ីរ៉ង់ និងសហរដ្ឋអាមេរិក នៅទីក្រុងអ៊ីស្លាម៉ាបាដ ប្រទេសប៉ាគីស្ថាន នៅថ្ងៃទី ១១-១២ ខែមេសា ដើម្បីឈានដល់កិច្ចព្រមព្រៀងមួយ៕ដោយ៖តារា
