ក្រុមបាល់ទាត់ជម្រើសជាតិអង់គ្លេសនឹងត្រូវបានការពារដោយកងសន្តិសុខចំនួនបីនៅឯមូលដ្ឋានទ័ពអាមេរិកដែលមានកំពែងរឹងមាំរបស់ពួកគេជាមួយនឹងអេក្រង់ការពារអ្នកលបបាញ់ និងកាំភ្លើងប្រឆាំងដ្រូន។

សារព័ត៌មានThe Sun បានរាយការណ៍ថា មូលដ្ឋានរបស់ក្រុមនេះនឹងត្រូវបានផ្លាស់ប្តូរទៅជា “បន្ទាយនិម្មិត” ដែលហ៊ុំព័ទ្ធទាំងស្រុងដោយរបាំងបេតុង និងអេក្រង់ដែលត្រូវបានរចនាឡើងដើម្បីរារាំងអ្នកលបបាញ់។

ដើម្បីទប់ស្កាត់ការស៊ើបការណ៍របស់យន្តហោះគ្មានមនុស្សបើក តំបន់ហាមឃាត់ការហោះហើរយ៉ាងតឹងរ៉ឹងនឹងត្រូវបានអនុវត្តនៅក្នុងតំបន់នោះ ហើយមជ្ឈមណ្ឌលបញ្ជាសន្តិសុខពិសេសមួយនឹងត្រូវបានបង្កើតឡើងនៅសណ្ឋាគារThe Inn at Meadowbrook Hotel ដែលមានទីតាំងនៅទល់មុខអគារនេះ។

ប៉ូលីសប្រដាប់អាវុធ មន្ត្រីសន្តិសុខ និងឆ្មាំឯកជននឹងបន្តល្បាតតាមបរិវេណនៅក្នុងភូមិ Prairieរដ្ឋKansas ។

ពិធីសារសន្តិសុខតឹងតែងត្រូវបានជំរុញដោយការព្រួយបារម្ភទាក់ទងនឹងអត្រាឧក្រិដ្ឋកម្មកាំភ្លើងក្នុងស្រុក និងការគំរាមកំហែងដែលអាចកើតមានផ្សេងទៀត។

ប៉ូលីសក្នុងតំបន់នឹងដឹកជញ្ជូនជាផ្លូវការនូវឡានក្រុងរបស់ក្រុមអង់គ្លេសទៅមករវាងសណ្ឋាគារ និងកន្លែងហ្វឹកហាត់របស់ពួកគេ។ គ្រឿងបរិក្ខារនោះក៏នឹងត្រូវបានការពារយ៉ាងខ្លាំងពីភ្នែកសាធារណៈ និងការពារពីយន្តហោះគ្មានមនុស្សបើក។

ប្រភពដែលស្និទ្ធនឹងជំរុំហ្វឹកហាត់របស់ក្រុមតោកំណាចអង់គ្លេស បានបង្ហើបថា “សុវត្ថិភាព របស់កីឡាករ បុគ្គលិក និងក្រុមគ្រួសាររបស់ពួកគេគឺជាអាទិភាពទីមួយ ប៉ុន្តែការប្រុងប្រយ័ត្ននៅក្នុងសហរដ្ឋអាមេរិកត្រូវបានបង្កើនបន្ថែមទៀត” ។

នៅពេលដែលក្រុមរបស់ Thomas Tuchel ផ្លាស់ទីលំនៅជាផ្លូវការទៅកាន់រដ្ឋ Kansas នៅថ្ងៃទី 13 ខែមិថុនា ដៃគូ គ្រួសារ និងមិត្តភ័ក្តិរបស់កីឡាករនឹងត្រូវបានចេញប័ណ្ណពិសេស ដើម្បីអនុញ្ញាតឱ្យពួកគេចូលទៅខាងក្នុងខ្សែការពារ។

នៅម៉ិកស៊ិក និងកាណាដា ជាកន្លែងដែលអង់គ្លេសអាចលេងបានក្នុងវគ្គជម្រុះ នឹងប្រើប្រាស់ឧបករណ៍ទប់ទល់នឹងយន្តហោះគ្មានមនុស្សបើកដែលប្រើដោយដៃស្រដៀងគ្នា និងប្រព័ន្ធសង្គ្រាមអេឡិចត្រូនិចថេរ។

សន្តិសុខនឹងនៅតឹងតែងខ្លាំងលើសពីជំរំហ្វឹកហាត់។ សម្រាប់ការប្រកួតបើកឆាកក្នុងពូល World Cup របស់អង់គ្លេសនៅថ្ងៃទី 17 ខែមិថុនា នៅកីឡដ្ឋាន AT&T ដែលមានកៅអី 80,000 ក្នុងទីក្រុង Arlington ជិតទីក្រុង Dallas ប៉ូលីសបន្ថែមរាប់រយនាក់ត្រូវបានព្រាងចូល ហើយតំបន់ហាមហោះហើរនឹងត្រូវបានបង្កើតឡើង៕