អ៊ីរ៉ង់បានបាញ់មីស៊ីលជាបន្តបន្ទាប់ទៅលើអ៊ីស្រាអែល ដែលជាលើកដំបូងចាប់តាំងពីឈានដល់កិច្ចព្រមព្រៀងឈប់បាញ់ជាមួយសហរដ្ឋអាមេរិក ដើម្បីសងសឹកចំពោះការវាយប្រហារលើរដ្ឋធានីលីបង់។

ប្រធានសភាអ៊ីរ៉ង់ លោក Mohammad Ghalibaf បានចោទប្រកាន់សហរដ្ឋអាមេរិកកាលពីថ្ងៃទី 7 ខែមិថុនាថា «បានផ្តល់ភ្លើងខៀវ» ឲ្យអ៊ីស្រាអែលវាយប្រហារតំបន់ជាយក្រុងភាគខាងត្បូងនៃទីក្រុងបេរូត ប្រទេសលីបង់។ លោកបានប្រកាសថា មូលដ្ឋានទ័ព និងទ្រព្យសម្បត្តិរបស់សហរដ្ឋអាមេរិក និងអ៊ីស្រាអែលនៅមជ្ឈិមបូព៌ាឥឡូវនេះគឺជា «គោលដៅស្របច្បាប់»។
កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បាននិយាយថា ខ្លួនបានកំណត់គោលដៅមូលដ្ឋានទ័ពអាកាស Ramat David ដែលមានទីតាំងប្រហែល 20 គីឡូម៉ែត្រភាគអាគ្នេយ៍នៃទីក្រុង Haifa ប្រទេសអ៊ីស្រាអែល។ IRGC បាននិយាយថា «ប្រតិបត្តិការយប់នេះគឺជាការព្រមានមួយ។ ប្រសិនបើការឈ្លានពានត្រូវបានធ្វើម្តងទៀត វិធានការសងសឹកនឹងកាន់តែទូលំទូលាយ និងរួមបញ្ចូលគោលដៅទាំងអស់របស់សហរដ្ឋអាមេរិក និងអ៊ីស្រាអែលនៅក្នុងតំបន់»។
បញ្ជាការកណ្តាល Khatam al-Anbiya ដែលជាបញ្ជាការកំពូលនៃយោធាអ៊ីរ៉ង់ បានប្រកាសថា អ៊ីស្រាអែលបាន «ឆ្លងកាត់បន្ទាត់ក្រហមទាំងអស់» ក្នុងការវាយប្រហាររបស់ខ្លួនទៅលើទីក្រុងបេរូត ដោយទាមទារឱ្យទីក្រុង Tel Aviv បញ្ឈប់ប្រតិបត្តិការរបស់ខ្លួននៅក្នុងប្រទេសលីបង់។
ប៉ុន្មានម៉ោងក្រោយមក កងកម្លាំងការពារអ៊ីស្រាអែល (IDF) បានកត់ត្រាការបាញ់មីស៊ីលយ៉ាងហោចណាស់បីគ្រាប់ដែលកំណត់គោលដៅប្រទេសនេះ ដោយបន្ថែមថាបណ្តាញការពារដែនអាកាសរបស់ខ្លួន «កំពុងរកឃើញ និងស្ទាក់ចាប់ការគំរាមកំហែង»។ យោធាអ៊ីស្រាអែលក្រោយមកបាននិយាយថា ខ្លួនបានស្ទាក់ចាប់មីស៊ីលអ៊ីរ៉ង់ទាំង ១១ គ្រាប់ ដោយគ្មានរបាយការណ៍អំពីអ្នកស្លាប់ និងរបួសឡើយ។
នេះជាលើកដំបូងដែលអ៊ីរ៉ង់បានបាញ់មីស៊ីលចូលទៅក្នុងទឹកដីអ៊ីស្រាអែលចាប់តាំងពីបទឈប់បាញ់ជាមួយសហរដ្ឋអាមេរិកនៅថ្ងៃទី ៨ ខែមេសា៕

រូប​ថត​:vnexpress