ភ្នំពេញ៖ នាព្រឹកថ្ងៃចន្ទ ទី១៥ ខែមិថុនា ឆ្នាំ២០២៦ នេះ យុទ្ធនាការជាតិ «និយាយថាទេចំពោះព័ត៌មានក្លែងក្លាយ» ជំហានទី២ បានបន្តដំណើរចុះផ្សព្វផ្សាយយ៉ាងសកម្មនៅវិទ្យាល័យទួលទំពូង ដោយមានសិស្សានុសិស្សចូលរួមប្រមាណ ២ ០០០នាក់ ក្នុងបរិយាកាសសប្បាយរីករាយ ជាមួយនឹងការប្តេជ្ញាចិត្តរបស់យុវសិស្សក្នុងការចូលរួមប្រយុទ្ធប្រឆាំងព័ត៌មានក្លែងក្លាយក្នុងយុគសម័យឌីជីថល។

អញ្ជើញជាអធិបតីក្នុងពិធីនោះ លោក ទេព អស្នារិទ្ធ អនុរដ្ឋលេខាធិការ និងជាអ្នកនាំពាក្យក្រសួងព័ត៌មាន បានផ្សព្វផ្សាយគោលការណ៍ទម្លាប់ល្អគឺ៖ «៣កុំ ១ការពារ» សម្រាប់ជាខែលការពារយុវវ័យខ្លួនឯង សាលារៀន ក្រុមគ្រួសារ និងសហគមន៍ពីគ្រោះថ្នាក់នៃព័ត៌មានក្លែងក្លាយ។ 

លោកអនុរដ្ឋលេខាធិការបានពន្យល់អត្ថន័យគោលការណ៍ទម្លាប់ល្អ«៣កុំ ១ការពារ» យ៉ាងដូច្នេះថា៖ កុំទី១ គឺកុំទាន់ជឿ ពោលគឺបើឃើញព័ត៌មានប្លែកៗ កុំទាន់អាលជឿភ្លាមៗ ត្រូវផ្អាកគិតឱ្យបានបន្តិចសិន។ រីឯកុំទី២ គឺកុំទាន់ចែករំលែក (Share) នោះគឺកុំឱ្យដៃរហ័សជាងការគិតពិចារណា ត្រូវចំណាយពេល ១៥វិនាទីសិនដើម្បីផ្ទៀងផ្ទាត់ប្រភពឱ្យច្បាស់ បើមិនច្បាស់លាស់… កុំចែករំលែកបន្ត! កុំទី៣គឺ កុំប្រហែស ពោលគឺត្រូវការពារលេខសម្ងាត់(password) ផ្ទាល់ខ្លួន និងដាច់ខាតកុំចុចលើតំណ(លីង/link) ប្លែកៗ ដែលមិនស្គាល់ប្រភព។ ចំណែកឯ ១ការពារ គឺយើងរួមគ្នាការពារសហគមន៍ដោយប្រើប្រាស់អាវក្រោះ «អក្ខរកម្មព័ត៌មាន» និងចេះស្វែងរកតែប្រភពព័ត៌មានផ្លូវការ ដែលផ្តល់ព័ត៌មានពិតទុកចិត្តបាន។ 

ក្នុងឱកាសនោះដែរ លោក ទេព អស្នារិទ្ធ បានអប់រំយុវសិស្សឱ្យយល់ច្បាស់ពីតម្លៃ ព្រមទាំងតួនាទីដ៏សំខាន់នៃប្រព័ន្ធផ្សព្វផ្សាយកម្ពុជានៅក្នុងយុគសម័យឌីជីថល។ យុទ្ធនាការនេះបានជួយឱ្យសិស្សានុសិស្សមើលឃើញច្បាស់ពីតួនាទីស្នូលនៃប្រព័ន្ធផ្សព្វផ្សាយរដ្ឋ និងឯកជន ក្នុងការធានាសិទ្ធិទទួលព័ត៌មាន ហើយដែលប្រព័ន្ធផ្សព្វផ្សាយរដ្ឋ និងឯកជន បាននិងកំពុងប្រើប្រាស់បណ្តាញសង្គមយ៉ាងសកម្ម ដើម្បីផ្តល់ព័ត៌មានពិត ទាន់ហេតុការណ៍ និងជាទីទុកចិត្តជូនដល់ប្រជាពលរដ្ឋទូទាំងប្រទេស។ 

លោកអនុរដ្ឋលេខាធិការ បានដាស់តឿនសិស្សានុសិស្សដូច្នេះថា៖ «សូមក្មួយៗបោះបង់ទម្លាប់ ‘ប្រើប្រាស់អសកម្ម’ ដែលងាយជឿតាមគេ និងងាយរងគ្រោះថ្នាក់ ហើយងាកមកពង្រឹងសមត្ថភាពត្រិះរិះពិចារណា ដើម្បីក្លាយជា ‘កម្លាំងចលករ’ ដ៏វៃឆ្លាតក្នុងការគ្រប់គ្រងបច្ចេកវិទ្យា សម្រាប់ជាប្រយោជន៍ដល់ការសិក្សា និងបង្កើនភាពធន់ទប់ទល់នឹងឥទ្ធិពលនៃព័ត៌មានក្លែងក្លាយ។ »

នាឱកាសនោះ តំណាងមន្ទីរអប់រំ យុវជន និងកីឡា អ្នកគ្រូលោកគ្រូ ព្រមទាំងសិស្សានុសិស្សវិទ្យាល័យទួលទំពូងទាំងអស់បានប្រកាសគាំទ្រចំពោះ «យុទ្ធនាការនិយាយថាទេចំពោះព័ត៌មានក្លែងក្លាយ» ជំហានទី២ របស់ក្រសួងព័ត៌មាន ព្រមទាំងបានប្តេជ្ញាផ្លាស់ប្តូរឥរិយាបថមកជា «ភ្នាក់ងារសុវត្ថិភាពព័ត៌មាន» ដើម្បីរួមគ្នាការពារសន្តិសុខព័ត៌មាន ទប់ស្កាត់ការរីករាលដាលនៃព័ត៌មានក្លែងក្លាយ និងការឆបោកតាមអនឡាញ ដែលកំពុងយាយីដល់សណ្តាប់ធ្នាប់សង្គមជាតិ ក្នុងយុគសម័យបច្ចេកវិទ្យាទំនើបនេះ។

សូមបញ្ជាក់ថា យុទ្ធនាការជំហានទី២ក្រោមប្រធានបទ«ពង្រឹងអក្ខរកម្មព័ត៌មាន និងប្រព័ន្ធផ្សព្វផ្សាយដើម្បីសុវត្ថិភាពព័ត៌មាន»ត្រូវបានប្រកាសដាក់ឱ្យដំណើរការជាផ្លូវការកាលពីថ្ងៃទី១៨ ខែឧសភា ឆ្នាំ២០២៦ នៅវិទ្យាល័យសម្តេចហ៊ុនសែនប៊ុន រ៉ានីវត្តភ្នំ ក្រោមអធិបតីភាព លោក នេត្រ ភក្ត្រា រដ្ឋមន្ត្រីក្រសួងព័ត៌មាន។ យុទ្ធនាការជំហានទី២នេះ បាន និងកំពុងធ្វើដំណើរទៅតាមបណ្តាវិទ្យាល័យ អនុវិទ្យាល័យក្នុងរាជធានីភ្នំពេញ ខេត្តព្រះវិហារ ខេត្តតាកែវ និងបន្តទៅខេត្តផ្សេងៗទៀតជាបន្តបន្ទាប់ នៅទូទាំងប្រទេសក្នុងឆ្នាំ២០២៦នេះ៕

ដោយ ៖ សិលា