ម៉ិកស៊ីកូស៊ីធី៖ ខណៈការប្រកួត FIFA World Cup 2026 កំពុងប្រព្រឹត្តទៅ អ្នកគាំទ្ររាប់ពាន់នាក់បាននាំគ្នាទៅកាន់វិហារធំ Metropolitan Cathedral ក្នុងទីក្រុងម៉ិកស៊ីកូ ដើម្បីបួងសួងនៅមុខរូបសំណាក “ព្រះយេស៊ូទារក” ដែលស្លៀកពាក់ឯកសណ្ឋានក្រុមបាល់ទាត់ជម្រើសជាតិម៉ិកស៊ិក ដោយសង្ឃឹមថាក្រុមជាតិរបស់ពួកគេនឹងអាចបង្កើតអព្ភូតហេតុ និងឈ្នះពានរង្វាន់ World Cup។

ប្រពៃណីនេះមានដើមកំណើតតាំងពីឆ្នាំ 1970 នៅពេលម៉ិកស៊ិកធ្វើជាម្ចាស់ផ្ទះ World Cup ជាលើកដំបូង។

ទោះជាយ៉ាងណា ឆ្នាំនេះ រូបសំណាក “ព្រះយេស៊ូទារកបាល់ទាត់” ត្រូវបានដាក់តាំងនៅក្នុងវិហារធំបំផុតរបស់ប្រទេស ដែលបានទាក់ទាញអ្នកគាំទ្រជាច្រើនឱ្យមកគោរពបូជា និងសុំឱ្យក្រុមជាតិទទួលបានជ័យជម្នះ។

នៅប្រទេសម៉ិកស៊ិក គេមានទម្លាប់ស្លៀកពាក់រូបសំណាកព្រះយេស៊ូទារកជាច្រើនទម្រង់ ដូចជាសម្លៀកបំពាក់អ្នកធម្មយាត្រា ដើម្បីសុំការពារអ្នកធ្វើដំណើរ ឬសម្លៀកបំពាក់គ្រូពេទ្យ ដើម្បីសុំសុខភាពល្អ។

ការស្លៀកពាក់ព្រះយេស៊ូទារកជាឯកសណ្ឋានបាល់ទាត់បានចាប់ផ្តើមនៅព្រះវិហារ San Miguel Arcangel ក្នុងតំបន់ក្រីក្រមួយនៃទីក្រុងម៉ិកស៊ីកូកាលពី 55 ឆ្នាំមុន។ ប៉ុន្តែឆ្នាំនេះ បូជាចារ្យថ្មីបានហាមឃាត់ការអនុវត្តនោះ ដោយចាត់ទុកថាជាការមិនគោរពដល់សាសនា។

ការសម្រេចចិត្តនេះបានបង្កឱ្យមានការរិះគន់ពីសំណាក់អ្នកគាំទ្រមួយចំនួន ដែលថែមទាំងបារម្ភថា អាចជះឥទ្ធិពលអាក្រក់ដល់ទម្រង់លេងរបស់ក្រុមជាតិផងដែរ។ ជាហេតុនាំឱ្យវិហារ Metropolitan Cathedral សម្រេចដាក់តាំងរូបសំណាកព្រះយេស៊ូទារកពាក់អាវ “El Tri” ឬក្រុមជម្រើសជាតិម៉ិកស៊ិក។

លោក Manuel Corral មន្ត្រីសាសនាចក្រ បានប្រាប់ Reuters ថា៖

«នេះជាលើកដំបូងដែលរូបសំណាកនេះត្រូវបានដាក់តាំងនៅក្នុងវិហារធំ។ ប្រជាជនខ្លួនឯងបានស្នើសុំឱ្យធ្វើបែបនេះ»។

លោកបន្ថែមថា មិនត្រឹមតែអ្នកគាំទ្រម៉ិកស៊ិកប៉ុណ្ណោះទេ ដែលមកបួងសួងនៅទីនេះ។ អ្នកគាំទ្រមកពីប្រទេសផ្សេងៗក៏បានមកសុំជ័យជម្នះសម្រាប់ក្រុមជាតិរបស់ពួកគេផងដែរ។

រូបសំណាកនេះនឹងត្រូវដាក់តាំងរហូតដល់ចប់ការប្រកួត World Cup មិនថាម៉ិកស៊ិកទទួលបានលទ្ធផលយ៉ាងណាក៏ដោយ។ នៅថ្ងៃអង្គារ ព្រះយេស៊ូទារកត្រូវបានស្លៀកអាវពណ៌ស និងខោខ្លីពណ៌បៃតង ដែលស្រដៀងនឹងឯកសណ្ឋានដែលម៉ិកស៊ិកគ្រោងពាក់ក្នុងការប្រកួតជាមួយកូរ៉េខាងត្បូងនៅទីក្រុង Guadalajara។

អ្នកគាំទ្រមកពី អាហ្សង់ទីន កូឡុំប៊ី អេស្ប៉ាញ ម៉ិកស៊ិក និងប្រទេសផ្សេងៗ បានឈប់ថតរូប និងបួងសួងសុំជ័យជម្នះសម្រាប់ក្រុមជាតិរបស់ពួកគេ។

ទោះជាយ៉ាងណា មិនមែនគ្រប់គ្នាសុទ្ធតែគាំទ្រគំនិតនេះឡើយ។ លោក Eleazar Martinez អ្នកគាំទ្រម៉ិកស៊ិកម្នាក់ បាននិយាយថា៖ «ក្នុងនាមជាអ្នកកាន់សាសនាកាតូលិក ខ្ញុំមានអារម្មណ៍ចម្លែកណាស់ពេលឃើញព្រះយេស៊ូទារកស្លៀកពាក់បែបនេះ។ ខ្ញុំមិនសូវយល់ស្របនឹងវាទេ»។

ទោះបីមានមតិខុសគ្នាក៏ដោយ រូបសំណាក “ព្រះយេស៊ូទារកបាល់ទាត់” បានក្លាយជាចំណុចទាក់ទាញថ្មីមួយសម្រាប់អ្នកគាំទ្របាល់ទាត់ក្នុងអំឡុងពេល World Cup 2026 ដោយបង្ហាញពីការរួមបញ្ចូលគ្នារវាងជំនឿសាសនា និងក្តីស្រមៃក្នុងវិស័យកីឡា៕