ខេត្តស្ទឹងត្រែង៖ករណីគ្រោះថ្នាក់ចរាចរណ៍ដ៏រន្ធត់មួយ បានកើតឡើងទាំងកណ្តាលអធ្រាត្រ បណ្តាលឱ្យ មនុស្ស ២នាក់បានបាត់បង់ជីវិត និង ៣នាក់ទៀតរងរបួសស្រាល ក្នុងហេតុការណ៍ម៉ូតូ ៣គ្រឿងបុកគ្នាយ៉ាងពេញទំហឹង នៅលើផ្លូវខេត្តលេខ៦៤។
ហេតុការណ៍នេះបានកើតឡើងកាលពីវេលាម៉ោង១១ និង ៥៦ នាទី យប់ថ្ងៃទី១៧ ខែមិថុនាឆ្នាំ២០២៦ ត្រង់ចំណុចកងចក្រ ស្ថិតក្នុងភូមិត្រពាំងព្រីង សង្កាត់ស្ទឹងត្រែង ក្រុងស្ទឹងត្រែង ខេត្តស្ទឹងត្រែង។
តាមរបាយការណ៍ពីនគរបាលចរាចរណ៍ផ្លូវគោក ខេត្តស្ទឹងត្រែងឱ្យដឹងថា មុនពេលកើតហេតុ គេបានឃើញម៉ូតូ១គ្រឿងម៉ាក Honda Winner ពណ៌ខ្មៅគ្មានផ្លាកលេខ បើកបរដោយ យុវជនឈ្មោះ សាយ រីយ៉ា អាយុ២១ឆ្នាំ ក្នុងទិសដៅពីជើងទៅត្បូង។ លុះមកដល់ចំណុចកើតហេតុដោយសារ ការបើកបរខ្វះការប្រុងប្រយ័ត្ន និងមិនប្រកាន់ស្តាំ ក៏បានទៅគៀម៉ូតូ១គ្រឿងម៉ាក Honda Dream ស៊េរីឆ្នាំ១២៥ ពណ៌ខ្មៅ ពាក់ផ្លាកលេខ ត្បូងឃ្មុំ 1A-5677 បើកបរដោយនារីម្នាក់ឈ្មោះ ចាន់ លីតា អាយុ ១៩ឆ្នាំ ដែលកំពុងធ្វើដំណើរបញ្ច្រាស ទិសគ្នា។ ភ្លាមៗនោះម៉ូតូបង្កបានបន្តទៅបុកយ៉ាងពេញ ទំហឹងជាមួយម៉ូតូ១គ្រឿងទៀត ម៉ាក Honda Beat ពណ៌ស ពាក់ផ្លាកលេខ ភ្នំពេញ 1IP-1974 បើកបរដោយបុរសឈ្មោះ ប៊ុត ស៊ី សុវណ្ណចន្ទ្រា អាយុ ៣៤ឆ្នាំ ដែលកំពុង ធ្វើដំណើរស្របទិសគ្នា។
សមត្ថកិច្ចបានបញ្ជាក់ថា គ្រោះថ្នាក់ដ៏ធ្ងន់ធ្ងរនេះបានបណ្តាលឱ្យ១. យុវជនបើកបរម៉ូតូបង្ក (Honda Winner) ឈ្មោះ សាយ រីយ៉ា ស្លាប់បាត់បង់ជីវិតភ្លាមៗនៅកន្លែងកើតហេតុ,២. បុរសបើកបរម៉ូតូ Honda Beat ឈ្មោះ ប៊ុត ស៊ី សុវណ្ណចន្ទ្រា បានរងរបួសធ្ងន់ និងបានស្លាប់បាត់បង់ជីវិតជាអកុសល ពេលបញ្ជូនទៅសង្គ្រោះនៅមន្ទីរពេទ្យបង្អែកខេត្តស្ទឹងត្រែងនិង៣. នារីបើកបរម៉ូតូ Honda Dream និងអ្នករួមដំណើរ ២នាក់ទៀតសរុប ៣នាក់ បានរងរបួសស្រាល។ ចំណែកឯមធ្យោបាយធ្វើដំណើរទាំង ៣គ្រឿង រងការខូចខាតធ្ងន់ធ្ងរ ២គ្រឿង និងស្រាល ១គ្រឿង។
បច្ចុប្បន្ន វត្ថុតាងម៉ូតូទាំង ៣គ្រឿង ត្រូវបានកម្លាំងជំនាញចរាចរណ៍ផ្លូវគោក យកទៅរក្សាទុកនៅស្នងការដ្ឋាននគរបាលខេត្តស្ទឹងត្រែង ដើម្បីបន្តនីតិវិធីដោះស្រាយតាមច្បាប់។
យោងតាម ច្បាប់ស្តីពីចរាចរណ៍ផ្លូវគោក នៃព្រះរាជាណាចក្រកម្ពុជា ការបើកបរប្រកាន់ស្តាំ (មាត្រា ១២)៖អ្នកបើកបរយានយន្តគ្រប់រូប ត្រូវតែបើកបរនៅខាងស្តាំនៃទិសដៅធ្វើដំណើររបស់ខ្លួន។ ការបើកបររំលោភគន្លងផ្លូវទៅខាងឆ្វេង ឬមិនប្រកាន់ស្តាំ មិនត្រឹមតែជាការបំពានច្បាប់ ដែលត្រូវរងការផាកពិន័យនោះទេ ប៉ុន្តែវាជាមូលហេតុចម្បងដែលបង្កឱ្យមានគ្រោះថ្នាក់បុកទង្គិចគ្នាដោយចំពីមុខ ដែលតែងតែបណ្តាលឱ្យមានមនុស្សស្លាប់ និងរបួសធ្ងន់ធ្ងរ។
មន្ត្រីជំនាញបានសង្កត់ធ្ងន់ថា ការបើកបរនៅពេលយប់ ទាមទារឱ្យមានការបន្ថែមការប្រុងប្រយ័ត្នទ្វេដង ពីព្រោះទិដ្ឋភាពមើលឃើញមានកម្រិត។ អ្នកបើកបរត្រូវតែបន្ថយល្បឿនឱ្យស្ថិតក្នុងកម្រិតមួយដែលអាចគ្រប់គ្រងស្ថានការណ៍បាន ស្របតាមស្ថានភាពផ្លូវ និងពន្លឺ។ យានយន្តដែលធ្វើដំណើរលើផ្លូវថ្នល់ ត្រូវតែមានចុះបញ្ជី និងពាក់ផ្លាកលេខសម្គាល់ឱ្យបានត្រឹមត្រូវ ដើម្បីងាយ ស្រួលក្នុងការគ្រប់គ្រង និងកំណត់អត្តសញ្ញាណពេលមានបទល្មើស ឬគ្រោះថ្នាក់កើតឡើង៕
