ខ្សែប្រយុទ្ធកំពូលរបស់បារាំង Kylian Mbappé បានបង្ហាញថា រូបគេមានក្តីរំភើបនិងស្រែកឃ្លានយ៉ាងខ្លាំងក្នុងការប្រជែងពានរង្វាន់ស្បែកជើងមាស (Golden Boot) ជាមួយ Lionel Messi ប៉ុន្តែបានបញ្ជាក់ថា គោលដៅផ្ទាល់ខ្លួនទាំងអស់ត្រូវស្ថិតក្រោមគោលដៅរួមរបស់ក្រុមជម្រើសជាតិបារាំង។

Mbappé បានថ្លែងនៅក្នុងសន្និសីទសារព័ត៌មាន មុនការប្រកួតពូល C ជាមួយអ៊ីរ៉ាក់នៅថ្ងៃចន្ទ ដែលជាការប្រកួតដែលអាចជួយឱ្យបារាំងធានាកៅអីទៅកាន់វគ្គបន្ទាប់។

ខ្សែប្រយុទ្ធវ័យ 27 ឆ្នាំរូបនេះ បាននិយាយថា៖ «វាតែងតែជាកិត្តិយសក្នុងការលេងឱ្យក្រុមជម្រើសជាតិ ហើយសម្រាប់ខ្ញុំ គ្មានអ្វីធំជាងនេះទៀតទេ។ ការបង្ហាញខ្លួន 100 ប្រកួតគឺជាប្រវត្តិសាស្ត្រ ហើយការធ្វើវានៅ World Cup កាន់តែពិសេស។ ប៉ុន្តែអ្វីដែលសំខាន់បំផុត គឺយើងត្រូវឈ្នះដើម្បីឡើងទៅវគ្គបន្ទាប់។»

បន្ទាប់ពីស៊ុតបញ្ចូលទីបាន 2 គ្រាប់ក្នុងជ័យជម្នះ 3-1 លើសេណេហ្គាល់ Mbappé បានបង្កើនចំនួនគ្រាប់បាល់របស់ខ្លួននៅ World Cup ដល់ 14 គ្រាប់ ដែលនៅសល់តែ 2 គ្រាប់ទៀតប៉ុណ្ណោះតាមស្មើកំណត់ត្រា 16 គ្រាប់របស់ Miroslav Klose។ ខណៈនោះ Messi បានតាមស្មើកំណត់ត្រានេះរួចហើយ ក្រោយស៊ុត Hat-trick ក្នុងជ័យជម្នះ 3-0 លើអាល់ហ្សេរី។

Mbappé បាននិយាយថា៖ «ខ្ញុំដឹងថា Messi នឹងស៊ុតបញ្ចូលទី ព្រោះគាត់តែងតែធ្វើបែបនោះ។ គាត់នៅខាងមុខខ្ញុំ ប៉ុន្តែខ្ញុំនឹងបន្តរកគ្រាប់បាល់ ដើម្បីជួយក្រុមឱ្យឈានទៅឆ្ងាយបំផុត។ ការស៊ុតបញ្ចូលទីអាចជួយបំបែកកំណត់ត្រា ប៉ុន្តែខ្ញុំចង់ឈ្នះ World Cup ជាងអ្វីទាំងអស់។»

ការប្រជែងរកគ្រាប់បាល់នៅ World Cup ឆ្នាំនេះកាន់តែក្តៅគគុក បន្ទាប់ពី Messi, Mbappé, Harry Kane និង Erling Haaland សុទ្ធតែបង្ហាញសមត្ថភាពស៊ុតបញ្ចូលទីយ៉ាងល្អ។

ទោះជាយ៉ាងណា នៅពេលត្រូវបានសួរថា តើនរណាជាកីឡាករល្អបំផុតក្នុងចំណោមពួកគេទាំងបួន Mbappé បានឆ្លើយដោយមិនស្ទាក់ស្ទើរថា៖
«Lionel គឺជាកីឡាករល្អបំផុតក្នុងចំណោមពួកយើងទាំងបួន។ គាត់ជាកីឡាករល្អបំផុតក្នុងចំណោមកីឡាករល្អបំផុត រួមជាមួយ Cristiano Ronaldo។ គាត់បានបង្ហាញគុណភាពដ៏អស្ចារ្យអស់រយៈពេលជាង 15 ឆ្នាំមកហើយ។ ចំពោះអ្នកផ្សេងទៀត វាជាប្រធានបទសម្រាប់អ្នកសារព័ត៌មាន និងអ្នកគាំទ្រជជែកគ្នា។ ខ្ញុំគ្រាន់តែផ្តោតលើការបង្ហាញសមត្ថភាពរបស់ខ្ញុំប៉ុណ្ណោះ។»

Mbappé ក៏បានការពារមិត្តរួមក្រុម Ousmane Dembélé ដែលតែងតែរងការរិះគន់ពីសារព័ត៌មានបារាំងផងដែរ។

គាត់បានលើកឡើងថា Dembélé មានតួនាទីសំខាន់ក្នុងការបង្កើតឱកាស ទោះបីជាស្ថិតិនៅលើក្រដាសមិនបានបង្ហាញក៏ដោយ។ «នៅតង់ទីមួយ គាត់គឺជាខ្សែប្រយុទ្ធល្អបំផុតរបស់យើង។ គាត់ធ្វើឱ្យការលេងមានភាពរលូន។ នៅពេល Michael Olise និងខ្ញុំបង្កើតគ្រាប់បាល់ដំបូង Dembélé ក៏បានជួយបង្កើតចន្លោះផងដែរ។ វាមិនបង្ហាញក្នុងស្ថិតិទេ ប៉ុន្តែវាមានសារៈសំខាន់ណាស់។»

ចំពោះបញ្ហាការផ្អាកប្រកួតដើម្បីឱ្យកីឡាករផឹកទឹក (Hydration Break) ដែលកំពុងក្លាយជាប្រធានបទពិភាក្សានៅ World Cup ឆ្នាំនេះ Mbappé បានឆ្លើយយ៉ាងខ្លីថា៖ «កុំសួរកីឡាករអំពីរឿងនេះ ព្រោះយើងនឹងផ្លាស់ប្តូរយោបល់គ្រប់ពេល។ បើក្រុមយើងកំពុងនាំមុខ ហើយការផ្អាកធ្វើឱ្យចង្វាក់លេងខូច ខ្ញុំនឹងមិនចូលចិត្តវាទេ។ ប៉ុន្តែបើអាកាសធាតុក្តៅ ខ្ញុំគិតថាវាជារឿងល្អ។»

ជាមួយនឹងទម្រង់លេងដ៏ល្អ និងទំនុកចិត្តខ្ពស់ Mbappé នឹងដឹកនាំបារាំងស្វែងរកជ័យជម្នះលើអ៊ីរ៉ាក់ ដើម្បីធានាកៅអីទៅកាន់វគ្គ 32 ក្រុមចុងក្រោយ ខណៈការប្រជែងស្បែកជើងមាសជាមួយ Messi ក៏កំពុងទាក់ទាញការចាប់អារម្មណ៍ពីអ្នកគាំទ្រទូទាំងពិភពលោកផងដែរ៕