ខេត្តសៀមរាប៖ របាំងស្បៃមុង ខុសច្បាប់ពាក់ព័ន្ធបទល្មើសនេសាទរាប់រយម៉ែត្រ ដែលក្រុមជនល្មើសនេសាទខុសច្បាប់ បានដាក់ពណ្ណរាយតាមផ្ទៃទឹក ត្រូវបានកម្លាំងសមត្ថកិច្ចជំនាញសង្កាត់រដ្ឋបាលជលផល និងកងកម្លាំងយោធា សហការចុះបង្ក្រាបបទល្មើសនេសាទ នៅព្រំប្រទល់ខេត្តកំពង់ធំ-សៀមរាប។
ជាក់ស្ដែងនាយសង្កាត់រដ្ឋបាលជលផលពាមបាង លោក ហួន ផល បានសហការជាមួយលោកអនុសេនីយ៍ឯក លុយ សុភាព នាយទាហាន នៃតំបន់ប្រតិបត្តិការសឹករងកំពង់ធំ យោធភូមិភាគទី៤ នៅថ្ងៃទី២២ ខែមិថុនា ឆ្នាំ២០២៦ ដឹកនាំមន្ត្រីសង្កាត់រដ្ឋបាលជលផល និងកងកម្លាំងយោធា ចុះត្រួតពិនិត្យ និងបង្រ្កាបបទល្មើសនេសាទនៅចំណុចពាមឈើកែវ ដល់កប់ចិន ជាប់ព្រំប្រទល់ឃុំអន្លុងសំណរស្រុកជីក្រែង ខេត្តសៀមរាប និងឃុំពាមបាង ស្រុកស្ទោង ខេត្តកំពង់ធំ។
បេសកកម្មនេះ ក្រុមការងារជំនាញ បានរុះរើកាប់បំផ្លាញចោលរបាំងស្បៃមុង ខុសច្បាប់នៅនឹងកន្លែងរួមមាន របាំងស្បៃមុងចំនួន១១ របាំងប្រវែង ៦៥០ ម៉ែត្រ ឡុកស្បៃមុងចំនួន ១១គ្រឿង លូឬលបស្បៃមុង ចំនួន២២មាត់ បង្គោលចំនួន ៥៥០ដើម ព្រមទាំងចាក់លែងត្រីចម្រុះចំនួន១០គីឡូក្រាម៕ដោយ៖តារា
