ខ្សែប្រយុទ្ធជម្រើសជាតិប្រេស៊ីល Neymar បានធ្វើឱ្យមហាជនភ្ញាក់ផ្អើលជាថ្មី ដោយចំណាយប្រាក់រហូតដល់ ១លានដុល្លារអាមេរិក ដើម្បីទិញនាឡិកាប្រណិតមួយគ្រឿង ក្នុងថ្ងៃសម្រាកពីការប្រកួតនៅពានរង្វាន់ FIFA World Cup 2026។

កីឡាករវ័យ ៣៤ឆ្នាំរូបនេះ កំពុងស្ដារកាយសម្បទាពីរបួសសាច់ដុំកំភួនជើង ដែលធ្លាប់ធ្វើឱ្យសូម្បីតែប្រធានាធិបតីប្រេស៊ីល Luiz Inácio Lula da Silva រិះគន់ជាសាធារណៈ មុនពេល Neymar វិលត្រឡប់មកជួយក្រុមក្នុងជ័យជម្នះលើស្កុតឡែន។

ប៉ុន្តែលើកនេះ Neymar បានក្លាយជាប្រធានបទចម្រូងចម្រាសម្ដងទៀត បន្ទាប់ពីបង្ហាញនាឡិកាថ្មីម៉ាក Astronomia Dragon & Tiger ដែលផលិតពីមាសស (White Gold) និងតុបតែងដោយត្បូងពេជ្រចំនួន 286 គ្រាប់។

នាឡិកាដ៏ប្រណិតនេះ មានរូបនាគ និងខ្លាសិប្បកម្មដោយដៃ ព្រមទាំងតុបតែងដោយត្បូង Sapphire និង Emerald ដែលតំណាងឱ្យភពនានា។ Neymar បានទិញវាដោយផ្ទាល់ពីក្រុមហ៊ុនផលិតគ្រឿងអលង្ការ និងនាឡិកាដ៏ល្បីរបស់សហរដ្ឋអាមេរិក Jacob & Co. ដែលបង្កើតឡើងដោយ Jacob Arabo។

ការទិញនាឡិកាថ្មីនេះ បានបន្ថែមទៅលើចំនួននាឡិការបស់ Neymar ដែលបច្ចុប្បន្នមានតម្លៃសរុបលើស ៨លានដុល្លារអាមេរិក។

ក្នុងចំណោមនោះ មាននាឡិកាកម្រ Richard Mille RM 68-01 Cyril Kongo ដែលផលិតត្រឹមតែ 30 គ្រឿងប៉ុណ្ណោះនៅលើពិភពលោក និងមានតម្លៃប្រមាណ ១.៦លានផោន។

លើសពីនេះ Neymar ក៏មាននាឡិកាប្រណិតជាច្រើនទៀតដែលមានតម្លៃលើស ២០ម៉ឺនផោនក្នុងមួយគ្រឿង រួមមាន Casino Tourbillon, Opera Godfather, Epic SF24 World Time Titanium និង Bugatti Chiron Tourbillon។

គាត់ក៏ជាម្ចាស់នាឡិកា Rolex ជាច្រើនគ្រឿង និងនាឡិកាផលិតពិសេសពីរគ្រឿងដែលមានរចនាបថ Batman ស្របតាមចំណង់ចំណូលចិត្តរបស់គាត់ចំពោះតួអង្គកំពូលវីរបុរសនេះ។

ទោះជាយ៉ាងណា Neymar នឹងផ្តោតលើការវិលត្រឡប់មករកទម្រង់លេងល្អបំផុតវិញ បន្ទាប់ពីជាសះស្បើយពីរបួស ដើម្បីជួយប្រេស៊ីលប្រជែងពានរង្វាន់ World Cup លើកទី៦ក្នុងប្រវត្តិសាស្ត្ររបស់ពួកគេ។

អ្នកវិភាគជាច្រើនជឿជាក់ថា ប្រសិនបើ Neymar អាចរកបានកម្រិតលេងល្អបំផុតរបស់ខ្លួនវិញ គាត់នៅតែជាកីឡាករម្នាក់ដែលអាចបង្កើតភាពខុសគ្នា និងផ្លាស់ប្តូរលទ្ធផលការប្រកួតបាន៕