អភិបាលរងក្រុងប៉ារីសជឿជាក់ថាសហរដ្ឋអាមេរិកទទួលខុសត្រូវចំពោះរលកកំដៅដ៏សាហាវនៅអឺរ៉ុបខាងលិច ពីព្រោះវាជាប្រទេសដែលបញ្ចេញឧស្ម័នផ្ទះកញ្ចក់ធំជាងគេទីពីររបស់ពិភពលោក។
អ្នកស្រី Audrey Pulvar អនុប្រធានអភិបាលក្រុងប៉ារីសទទួលបន្ទុកទំនាក់ទំនងអន្តរជាតិ បានសរសេរនៅលើប្រព័ន្ធផ្សព្វផ្សាយសង្គមនៅថ្ងៃទី 28 ខែមិថុនា “ចំពោះអ្នកកាសែតអាមេរិក និង ‘តារាប្រព័ន្ធផ្សព្វផ្សាយសង្គម’៖ អស់រយៈពេលជាច្រើនថ្ងៃមកហើយ អ្នកខ្លះបានរិះគន់ និងចំអកទីក្រុងប៉ារីសចំពោះការមិនមានម៉ាស៊ីនត្រជាក់។ ព្រះជាម្ចាស់អើយ គួរឱ្យអស់សំណើចណាស់!”។
អ្នកស្រី Audrey Pulvar បានបន្តទៀតថា”ក្នុងនាមជាប្រទេសដែលបញ្ចេញឧស្ម័នផ្ទះកញ្ចក់ធំជាងគេទីពីររបស់ពិភពលោក អ្នកមានចំណែកសំខាន់នៃការទទួលខុសត្រូវចំពោះការឡើងកំដៅផែនដី និងផលវិបាកដែលយើងកំពុងរងទុក្ខនៅប្រទេសបារាំង។ ទីក្រុងរបស់អ្នក ដែលអគារ 90% មានម៉ាស៊ីនត្រជាក់ មិនមែនជាអ្នកគ្មានកំហុសក្នុងរឿងនេះទេ” ។
បន្ទាប់ពីរាយបញ្ជីគំនិតផ្តួចផ្តើមបៃតងរបស់ទីក្រុងប៉ារីស អ្នកស្រី Pulvar បានបញ្ចប់ការបង្ហោះរបស់នាងដោយរិះគន់សហរដ្ឋអាមេរិកចំពោះអ្វីដែលនាងបានពិពណ៌នាថាជា “ការមិនអើពើ” ចំពោះភពផែនដី។ “ដូច្នេះកុំបង្រៀនខ្ញុំ។ ចាប់ផ្តើមបំពេញកាតព្វកិច្ចរបស់អ្នក។ ដោយស្មោះ” អនុប្រធានអភិបាលក្រុងប៉ារីសបានសន្និដ្ឋាន។
មិនដូចនៅសហរដ្ឋអាមេរិកទេ ជាកន្លែងដែលម៉ាស៊ីនត្រជាក់ជារឿងធម្មតា នៅប្រទេសបារាំង មានតែគ្រួសារមួយក្នុងចំណោមបួនគ្រួសារប៉ុណ្ណោះដែលមានម៉ាស៊ីនត្រជាក់។
ប្រជាជនបារាំងតែងតែមានការសង្ស័យអំពីម៉ាស៊ីនត្រជាក់។ ការស្ទង់មតិរបស់ Ipsos ដែលបានចេញផ្សាយកាលពីដើមខែនេះបានបង្ហាញថា 78% នៃប្រជាជនបារាំងជឿថាម៉ាស៊ីនត្រជាក់បង្កគ្រោះថ្នាក់ដល់បរិស្ថាន ហើយម្នាក់ក្នុងចំណោមប្រាំមួយនាក់ដែលបានឆ្លើយតបបាននិយាយថា ពួកគេចង់ស៊ូទ្រាំនឹងកំដៅដើម្បីផលប្រយោជន៍របស់ភពផែនដីជាជាងដំឡើងម៉ាស៊ីនត្រជាក់៕

រូប​ថត​:AFP