ខេត្តបន្ទាយមានជ័យ៖ ដើម្បីជំរុញចលនាការរស់នៅស្អាត និងបង្កើនផលិតភាពកសិកម្មក្នុងគ្រួសារ មន្ត្រីជំនាញមកពីមន្ទីរកសិកម្ម រុក្ខាប្រមាញ់ និងនេសាទ បានចុះផ្ទាល់ដល់មូលដ្ឋានភូមិរង់ចាំ ឃុំស្លក្រាម ស្រុកស្វាយចេក ដើម្បីធ្វើការស្រង់ទិន្នន័យគ្រួសារប្រជាពលរដ្ឋភៀសសឹក សម្រាប់ត្រៀមលក្ខណៈចូលរួមក្នុងកម្មវិធីប្រកួតប្រជែងដ៏មានសារៈសំខាន់មួយគឺ ផ្ទះស្អាត និងការធ្វើកសិកម្ម ។
កាលពីថ្ងៃទី២ ខែកក្ដដា ឆ្នាំ២០២៦ ក្រុមការ ងារដឹកនាំដោយលោកស្រី កែវ គឹមអូន ប្រធានការិយាល័យកៅស៊ូ រួមជាមួយលោក ពិល ឆៃយ៉ា អនុប្រធានការិយាល័យផ្សព្វផ្សាយកសិកម្ម និងលោក ហន អឿន មន្ត្រីការិយាល័យក្សេត្រសាស្ត្រ និងផលិតភាពកសិកម្ម បានចុះដល់ទីតាំងផ្ទាល់ ដើម្បីវាយតម្លៃពីសក្តានុពល និងការរៀបចំលំនៅឋានរបស់ប្រជាពលរដ្ឋ។
លោកស្រី កែវ គឹមអូន បានបញ្ជាក់ថា ការចុះស្រង់ទិន្នន័យនេះ មិនមែនគ្រាន់តែជាការប្រមូលតួលេខធម្មតានោះទេ ប៉ុន្តែគឺជាយុទ្ធសាស្ត្រមួយក្នុងការកំណត់អត្តសញ្ញាណគ្រួសារដែលបានអនុវត្តជាក់ស្តែង ក្នុងគោលបំណងកែលម្អបរិស្ថានរស់នៅឱ្យមានសោភ័ណភាព និងការបង្កើតមុខរបរកសិកម្មខ្នាតតូចនៅក្នុងគ្រួសារ។
តាមរយៈការចុះអនុវត្តការងារផ្ទាល់ ក្រុមការងារបានប្រមូលទិន្នន័យពីគ្រួសារសរុបចំនួន ៣៤ខ្នងផ្ទះ ដោយបានបែងចែកជាពីរគោលដៅភូមិបន្ទាយមានឫទ្ធិចំនួន ១៦គ្រួសារភូមិសាមគ្គី ចំនួន ១៨គ្រួសារ។
កម្មវិធី ផ្ទះស្អាត និងការធ្វើកសិកម្ម ត្រូវបានរៀបចំឡើងក្នុងគោលបំណងលើសពីការប្រកួតប្រជែងសម្រស់លំនៅឋាន។ វាគឺជាការជំរុញឱ្យប្រជាពលរដ្ឋភៀសសឹកមានទម្លាប់រស់នៅប្រកប ដោយអនាម័យ សណ្តាប់ធ្នាប់ល្អ និងការប្រើប្រាស់ដីជុំវិញផ្ទះឱ្យមានប្រសិទ្ធភាពតាមរយៈការដាំដុះ ឬចិញ្ចឹមសត្វ ដើម្បីធានាបាននូវសន្តិសុខ បៀង និងការបង្កើនប្រាក់ចំណូលក្នុងគ្រួសារ។
ការចុះស្រង់ទិន្នន័យនេះ គឺជាជំហានដំបូងដ៏សំខាន់ ដើម្បីធានាបាននូវសុក្រឹតភាពក្នុងការវាយតម្លៃ និងផ្តល់ការគាំទ្របច្ចេកទេសបន្ថែមជូនដល់បងប្អូនប្រជាពលរដ្ឋ ស្របតាមគោលនយោបាយលើកកម្ពស់ជីវភាព និងសុខុមាលភាពសង្គមដែលរាជរដ្ឋាភិបាលកំពុងយកចិត្តទុកដាក់។
ដើម្បីបំប្លែងការលំបាកឱ្យទៅជាឱកាស និងលើកទឹកចិត្តដល់ការដាំដុះឱ្យកាន់តែមានសន្ទុះខ្លាំងក្លាថែមទៀតនោះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តបន្ទាយមានជ័យ ព្រមទាំងក្រុមការងារ បានដាក់ចេញនូវយន្តការជំរុញទឹកចិត្តដ៏មានប្រសិទ្ធភាពមួយ គឺការបើកយុទ្ធនាការ «ប្រឡងប្រណាំងផ្ទះស្អាត និងភូមិស្អាត» ដែលធ្វើឡើងរៀងរាល់ ៣ ខែម្តង។ ឯកឧត្តមបានបញ្ជាក់ថា «ចលនាប្រឡងប្រណាំងនេះ មិនត្រឹមតែបង្កើតឡើងដើម្បីសោភ័ណភាព និងអនាម័យប៉ុណ្ណោះទេ ប៉ុន្តែវាជាយុទ្ធសាស្ត្រពង្រឹងសន្តិសុខស្បៀងកម្រិតគ្រួសារ និងការបង្កើនប្រាក់ចំណូលបន្ថែមសម្រាប់ជនភៀសសឹក»។
យុទ្ធនាការនេះ នឹងធ្វើការវាយតម្លៃយ៉ាងម៉ត់ចត់ ដើម្បីជ្រើសរើសខ្នងផ្ទះគំរូចំនួន ៣ ដែលមានការរៀបចំអនាម័យល្អ និងមានសកម្មភាពដាំដុះឈានមុខគេ ដោយទទួលបានរង្វាន់លើកទឹកចិត្តជាថវិកាយ៉ាងក្រាស់ក្រែលពីរដ្ឋមន្ត្រីផ្ទាល់ -លេខ ១ទទួលបាន៣,០០០ ដុល្លារអាមេរិក ផ្ទះស្អាត អនាម័យល្អ, មានការដាំដុះដំណាំវិលជុំជុំវិញផ្ទះច្រើនជាងគេ និងមានលក្ខណៈបច្ចេកទេសត្រឹមត្រូវ។ -លេខ២ ទទួលបាន២,០០០ ដុល្លារអាមេរិក គ្រប់គ្រងបរិស្ថានជុំវិញផ្ទះបានល្អ និងមានការដាំដុះទ្រទ្រង់ជីវភាពសកម្ម។ -លេខ ៣បាន១,០០០ ដុល្លារអាមេរិក មានការចូលរួមចំណែកក្នុងសកម្មភាពកសិកម្ម និងថែរក្សាបរិស្ថានបានល្អសមរម្យ។
ក្រៅពីការប្រកួតប្រជែងកម្រិតបុគ្គល (ខ្នងផ្ទះ) ក៏មានការវាយតម្លៃជារួមលើការប្រឡងប្រណាំង «ភូមិស្អាត» ផងដែរ ដែលនឹងទទួលបានការឧបត្ថម្ភគាំទ្រជាសម្ភារៈ និងថវិកាសម្រាប់អភិវឌ្ឍន៍ហេដ្ឋារចនាសម្ព័ន្ធរួមនៅក្នុងសហគមន៍ភូមិរង់ចាំទាំងមូល៕
ដោយ ៖ សំរិត
