ភ្នំពេញ៖ ថ្លែងក្នុងសន្និសីទសារព័ត៌មាន លោក នីកូឡា ហ្វ័ររីស្យេ រដ្ឋមន្ត្រីប្រតិភូអមរដ្ឋមន្ត្រីក្រសួងអឺរ៉ុប និងការបរទេស ទទួលបន្ទុកពាណិជ្ជកម្មបរទេស និងការទាក់ទាញវិនិយោគ បានបញ្ជាក់ថា ប្រទេសបារាំង នឹងបន្តជំរុញឱ្យវិនិយោគិនបារាំងមកនៅកម្ពុជាបន្ថែមទៀត ខណៈ បច្ចុប្បន្នក្រុមហ៊ុនបារាំងប្រមាណ ២០០ កំពុងធ្វើអាជីវកម្មនៅកម្ពុជាទៅលើវិស័យសំខាន់ៗ ដូចជា វិស័យដឹកជញ្ជូន, ថាមពល, ហិរញ្ញវត្ថុ, សុខាភិបាល និងវិស័យចម្បងមួយចំនួនទៀត។
រដ្ឋមន្ត្រីប្រតិភូអមរដ្ឋមន្ត្រីក្រសួងអឺរ៉ុប និងការបរទេស បានលើកឡើងថា ក្រុមហ៊ុនបារាំងបានដើរតួនាទីយ៉ាងសំខាន់បានចូលរួមអភិវឌ្ឍន៍សេដ្ឋកិច្ចនៅកម្ពុជា ដែលក្រុមហ៊ុនបារាំងទាំងនោះវិនិយោគលើវិស័យចម្បងៗ ដូចជា វិស័យដឹកជញ្ជូន (ព្រលានយន្តហោះ), ថាមពល, ហិរញ្ញវត្ថុ, សុខាភិបាល, ទេសចរណ៍,សណ្ឋាគារ, និង វិស័យសំណង។
លោក នីកូឡា ហ្វ័ររីស្យេ បានបន្តថា ដើម្បីពង្រឹងទំនាក់ទំនងរបស់ប្រទេសទាំងពីរ គឺឯកឧត្តមអេម៉ានុយអែល ម៉ាក្រុង ប្រធានាធិបតីនៃសាធារណរដ្ឋបារាំង និងសម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានចង់ឃើញនូវការពង្រឹងការវិនិយោគរបស់បារំាងនៅកម្ពុជាបន្ថែមទៀត ជាពិសេសទៅលើគម្រោងជាក់លាក់មួយចំនួន ដូចជា គម្រោងហេដ្ឋារចនាសម្ព័ន្ធ ជាដើម។
សូមជម្រាបជូនថា ក្នុងអំឡុងពេលដំណើរទស្សនកិច្ចនៅកម្ពុជា កាលពីសប្ដាហ៍មុនលោក នីកូឡា ហ្វ័ររីស្យេ បានជួបពិភាក្សាជាមួយមន្រ្តីជាន់ខ្ពស់កម្ពុជា និងក្រុមហ៊ុនធំៗជាច្រើន ដើម្បីផ្លាស់ប្តូរយោបល់លើគម្រោងសេដ្ឋកិច្ចជាក់ស្តែង ក្នុងគោលបំណងពង្រឹងភាពជាដៃគូរវាងប្រទេសបារាំង និងកម្ពុជា ព្រមទាំងពង្រីកវត្តមានរបស់សហគ្រាសបារាំងនៅកម្ពុជា។
ដោយឡែកបើយោងតាមទិន្នន័យពីអគ្គនាយកដ្ឋានគយ និងរដ្ឋាករ (GDCE) បានបញ្ជាក់ថា ពាណិជ្ជកម្មទ្វេភាគីរវាងកម្ពុជា និងបារាំងបានឈានដល់ ៣២២,៨៣ លានដុល្លារអាមេរិក នៅក្នុងឆមាសទី១ ឆ្នាំ ២០២៦ កើនឡើង ១២,៩% បើប្រៀបធៀបទៅនឹងរយៈពេលដូចគ្នាក្នុងឆ្នាំ ២០២៥។ ក្នុងនោះ កម្ពុជាបាននាំចេញទៅបារាំងកក្នុងទំហំទឹកប្រាក់សរុបចំនួន ២៥៩,១១ លានដុល្លារអាមេរិក កើនឡើង ១៣,៥% ខណៈដែលកម្ពុជានាំចូលមកវិញមានចំនួន ៦៣,៧២ លានដុល្លារអាមេរិក កើនឡើង ១០,៥%។ ប្រទេសបារាំងគឺជាដៃគូពាណិជ្ជកម្មធំទី ១៦ របស់កម្ពុជា៕
ដោយ៖តារា
