ព្យុះទីហ្វុងបាវីបានបង្កឲ្យមានទឹកជំនន់ធ្ងន់ធ្ងរនៅក្នុងខេត្តហឺប៉ី និងខេត្តឡៅនីង ភាគឦសានប្រទេសចិន ដោយបានជន់លិចផ្លូវថ្នល់ និងបោកបក់រថយន្តជាច្រើនគ្រឿងតាមបណ្តោយផ្លូវលំ។

យោងតាមអ្នកស្រុកម្នាក់ កម្រិតទឹកបានកើនឡើងដល់ជាង 2 ម៉ែត្រនៅលើដងផ្លូវនានាក្នុងក្រុងគួនឆេង ដែលជាស្រុកមួយក្នុងខេត្តហឺប៉ី ប្រទេសចិន បន្ទាប់ពីព្យុះទីហ្វុងបាវី។
រថយន្តជាច្រើនត្រូវបានគេឃើញបុកគ្នានៅគួនឆេង នៅពេលដែលពួកវាបានរអិលឡើងចុះនៅលើផ្លូវលិចទឹក មុនពេលត្រូវបានចរន្តទឹកហូរខ្លាំងបោកបក់ទៅ។
ទឹកជំនន់បានកើតឡើងបន្ទាប់ពីព្យុះទីហ្វុងបាវី ដែលជាព្យុះទីហ្វុងខ្លាំងបំផុតដែលបានវាយប្រហារចិនដីគោកនៅឆ្នាំនេះ បាននាំមកនូវភ្លៀងធ្លាក់ខ្លាំងដល់ឆ្នេរសមុទ្រភាគខាងកើត និងខ្យល់បក់ខ្លាំងដល់ទីក្រុងដែលមានប្រជាជនរស់នៅច្រើននៅក្នុងតំបន់។
អាជ្ញាធរបានព្រមានថា ព្យុះនេះនឹងបន្តបង្កឲ្យមានភ្លៀងធ្លាក់ខ្លាំងនៅខេត្តជីលីន ឡៅនីង ហឺប៉ី សានតុង ជាំងស៊ូ និងអានហ៊ុយ ដែលធ្វើឲ្យហានិភ័យនៃទឹកជំនន់កាន់តែធ្ងន់ធ្ងរនៅក្នុងតំបន់ដែលលិចទឹករួចហើយពីភ្លៀងធ្លាក់ខ្លាំងពីមុន។
អ្នកភូមិប្រហែល 1,800 នាក់នៅក្រុងគួនឆេងបានជាប់គាំង នេះបើយោងតាមរបាយការណ៍របស់ CCTV ដែលគ្រប់គ្រងដោយរដ្ឋ ខណៈដែលអាជ្ញាធរបាននិយាយថា ការផ្លាស់ទីលំនៅ និងការតាំងទីលំនៅថ្មីរបស់ប្រជាជនគឺជាអាទិភាពចម្បងរបស់ពួកគេ។ នៅខេត្តឡៅនីង អាជ្ញាធរបានដំឡើងការព្រមានអំពីទឹកជំនន់ដល់ពណ៌ក្រហម ដោយព្រមានអំពីហានិភ័យខ្ពស់ខ្លាំង។
រដ្ឋាភិបាលហឺប៉ីបាននិយាយនៅក្នុងសេចក្តីថ្លែងការណ៍មួយនៅលើ WeChat ថា “ក្នុងអំឡុងពេលនៃការព្រមានពណ៌ក្រហមសម្រាប់ភ្លៀងធ្លាក់ខ្លាំង វិធានការទាំងអស់ដើម្បីបញ្ឈប់ការងារ បិទអាជីវកម្ម និងការពារការជួបជុំធំៗត្រូវតែអនុវត្តយ៉ាងពេញលេញ”។
សាជីវកម្មផ្លូវដែកចិនបានប្រកាសនៅថ្ងៃទី 13 ខែកក្កដាថា សេវាកម្មរថភ្លើងជាច្រើននៅក្រុងសិនយ៉ាងត្រូវបានលុបចោលដោយសារតែការរំខានលើផ្នែកផ្លូវដែកជាង 30 ។
តំបន់មួយចំនួននៅភាគឦសានប្រទេសចិនត្រូវបានគេរំពឹងថានឹងជួបប្រទះនឹងព្យុះផ្គររន្ទះ ឬព្យុះភ្លៀងកម្រិត 8 ឬខ្ពស់ជាងនេះ។ សាលារៀនក៏ត្រូវបានបិទនៅក្នុងតំបន់ជាច្រើនផងដែរ រួមទាំងខេត្តជីលីន៕

រូប​ថត​: EPA