ការទទួលទានផ្លែប៊ឺជារៀងរាល់ថ្ងៃ អាចជួយទ្រទ្រង់សុខភាពបេះដូង ខួរក្បាល និងពោះវៀន ព្រមទាំងជួយកាត់បន្ថយការរលាកក្នុងរាងកាយផងដែរ ដោយសារតែផ្លែឈើប្រភេទនេះមានផ្ទុកនូវជាតិសរសៃ (Fiber) ខ្លាញ់ល្អ វីតាមីន និងសារធាតុរ៉ែយ៉ាងសំបូរបែប។

 

យោងតាមគេហទំព័រសុខភាព Verywell Health បានឱ្យដឹងថា ផ្លែប៊ឺផ្តល់នូវជាតិសរសៃ ខ្លាញ់មិនទាន់ឆ្អែត (Unsaturated fats) និងសារធាតុចិញ្ចឹមសំខាន់ៗដូចជា វីតាមីន K អាស៊ីតហ្វូលិក (Folate) និងប៉ូតាស្យូម។ ផ្លែប៊ឺកន្លះផ្លែ (ឬប្រហែល ៦៨ ក្រាម) មានផ្ទុកថាមពលប្រហែល ៨០ កាឡូរី ជាតិសរសៃ ៣.៤ ក្រាម និងប៉ូតាស្យូម ២៥៤ មីលីក្រាម រួមជាមួយនឹងវីតាមីន B5 អាស៊ីតហ្វូលិក សារធាតុទង់ដែង និងវីតាមីន K ផងដែរ។

 

សារធាតុចិញ្ចឹមទាំងនោះបានរួមចំណែកផ្តល់នូវផលប្រយោជន៍សុខភាពជាច្រើន តាមរយៈការទទួលទានផ្លែប៊ឺជាប្រចាំ៖

 

១. ទ្រទ្រង់សុខភាពបេះដូង

 

ការពិនិត្យឡើងវិញលើការសិក្សាព្យាបាលបានរកឃើញថា ការទទួលទានផ្លែប៊ឺអាចជួយកាត់បន្ថយកម្រិតដង់ស៊ីតេទាបនៃលីប៉ូប្រូតេអ៊ីន ឬ LDL ដែលគេស្គាល់ជាទូទៅថាជា «កូឡេស្តេរ៉ុលអាក្រក់»។

 

ការជំនួសផ្នែកខ្លះនៃកាបូអ៊ីដ្រាតដែលត្រូវទទួលទានប្រចាំថ្ងៃ ដោយការញ៉ាំផ្លែប៊ឺកន្លះផ្លែទៅមួយផ្លែ គឺមានទំនាក់ទំនងទៅនឹងការកែលម្អរាល់រង្វាស់វាស់វែងនៃសុខភាពសរសៃឈាមបេះដូង រួមទាំងលំហូរឈាម កម្រិតកូឡេស្តេរ៉ុលសរុប និងទ្រីគ្លីសេរីដ (Triglycerides) ផងដែរ។

 

២. រក្សាខួរក្បាលឱ្យមានភាពរហ័សរហួន

 

ការទទួលទានផ្លែប៊ឺ អាចជួយកាត់បន្ថយកម្រិតចរាចរនៃប្រូតេអ៊ីន C-reactive ឬ CRP នៅក្នុងរាងកាយ ដែលវាជាសញ្ញាសម្គាល់ (Marker) មួយដែលគេនិយមប្រើប្រាស់បំផុតសម្រាប់វាស់វែងកម្រិតនៃការរលាកនៅក្នុងរាងកាយ។

 

៣. កាត់បន្ថយការរលាក

 

ការទទួលទានផ្លែប៊ឺទំហំមធ្យមមួយផ្លែជារៀងរាល់ថ្ងៃ ជួយធ្វើឱ្យសមតុល្យនៃបាក់តេរីល្អនៅក្នុងពោះវៀនមានភាពល្អប្រសើរឡើង និងបង្កើនផលិតកម្មនៃអាស៊ីតខ្លាញ់ខ្សែខ្លី (Short-chain fatty acids) ដែលជួយទ្រទ្រង់ដល់ប្រព័ន្ធរំលាយអាហារ និងសុខភាពពោះវៀន។

 

៤. ពង្រឹងសុខភាពពោះវៀន

 

តំបន់មួយផ្សេងទៀតដែលផ្លែប៊ឺអាចជះឥទ្ធិពលវិជ្ជមានខ្លាំង គឺសុខភាពពោះវៀន។ ការសិក្សាមួយបានរកឃើញថា ការទទួលទានផ្លែប៊ឺទំហំមធ្យមមួយផ្លែជារៀងរាល់ថ្ងៃ ជួយបង្កើនតុល្យភាពនៃបាក់តេរីល្អនៅក្នុងពោះវៀន ព្រមទាំងបង្កើនការផលិតអាស៊ីតខ្លាញ់ខ្សែខ្លី ដែលជួយសម្រួលដល់ដំណើរការរំលាយអាហារឱ្យកាន់តែមានប្រសិទ្ធភាព៕