ខេត្តបាត់ដំបង ៖ យោងតាមកាមេរ៉ាសុវត្ថិភាពបានបង្ហាញឲ្យឃើញមុខយ៉ាងច្បាស់ មុខជនសង្ស័័យចំនួន០២នាក់ ដែលបានឡើងបិទកញ្ចក់កាមេរ៉ា រួចគាស់សោទ្វារចូលលួចយកទូរស័ព្ទចម្រុះម៉ាកនៅក្នុងហាងមួយកន្លែងយកអស់ប្រមាណ៥០គ្រឿង នៅពេលម្ចាស់កំពុងដេកលក់ កាលពីវេលាម៉ោង២និង៥៩នាទីរំលងអធ្រាត្រឈានចូលថ្ងៃទី១៧ កក្កដា នៅក្នុងភូមិនរា២ ឃុំនរា ស្រុកសង្កែ ។
ម្ចាស់ហាងលក់ទូរស័ព្ទឈ្មោះ នូ នឿន បានបង្ហោះរូបភាពជនសង្ស័័យ ជាមួយនឹងសំណេរប៉ុន្មានឃ្លាថា ជនមិនស្គាល់មុខចំនួន០២នាក់បានគាស់សោទ្វារចូលលួចយកទូរស័ព្ទរបស់គាត់អសជាច្រើនគ្រឿង ។ លោកបានបញ្ជាក់បន្ថែមថា ទូរស័ព្ទដែលត្រូវចោរចូលលួចយកទៅ មានចម្រុះម៉ាកអស់ប្រមាណ៥០គ្រឿង ខណៈដែលគាត់កំពុងដេកលក់ ហើយបានដឹងនៅពេលព្រឹកឡើង ។
ក្រោយពីបានត្រូតពិនិត្យការបាត់បង់ទូរស័ព្ទ គាត់ក៏បានរាយការណ៍ទៅកាន់សមត្ថកិច្ចភ្លាមៗដែរ ។ នៅក្នុងឃ្លីបវីដេអូរខ្លី ដែលថតជាប់ដោយកាមេរ៉ាសុវត្ថិភាពបានបង្ហាញអំពីសកម្មភាពក្រុមចោរដែលចូលលួចទូរស័ព្ទនៅក្នុងហាង ។ គេឃើញជនម្នាក់បានដើរចូលរកមើលទូរស័ព្ទនៅក្នុងទូ រួចព្យាយាមឈោងទាញបិទមុខកញ្ចក់កាមេរ៉ា ខណៈជនម្នាក់ទៀតពាក់អាវយឺតដៃខ្លី ស្ពាយកាបូបខាងមុខ ពាក់មួកក្រណាត់ ដើរមកពីក្រោយបង្ហាញមុខច្បាស់ដូចថ្ងៃ នៅចំពោះមុខកញ្ចក់កាមេរ៉ាសុវត្ថិភាព ។
សមត្ថកិច្ចបានចុះទៅកាន់ទីតាំងកើតហេតុ ដើម្បីសួរនាំម្ចាស់ហាងលក់ទូរស័ព្ទ ។ មន្ត្រីជំនាញហាក់មិនទាន់អាចកំណត់ពីមុខសញ្ញាជនសង្ស័យទាំង០២នាក់ ដែលបាន បង្ហាញមុខនៅលើកាមេរ៉ាសុវត្ថិភាពនោះបាននៅឡើយទេ ព្រោះមន្ត្រីជំនាញ បាននិងកំពុងធ្វើការតាមដាន ឬស្រាវជ្រាវលើតម្រុយផ្សេងៗទៀត ។
ប៉ុន្តែយ៉ាងណា ទាំងជនរងគ្រោះ ទាំងមហាជនរំពឹងថា សមត្ថកិច្ចនឹងធ្វើការស្រាវជ្រាវតាមចាប់ខ្លួនជនទាំង០២នាក់នោះបានក្នុងពេលខាងមុខនេះជាមិនខាន ដោយយោងលើមុខមាត់លោកចោរទាំង០២នាក់ដែលបានបង្ហាញយ៉ាងច្បាស់នៅចំពោះកញ្ចក់កាមេរ៉ាសុវត្ថិភាព៕
ដោយ៖ សុរិយា
