យោធាកាណាដាកំពុងរៀបចំដាក់ពង្រាយយន្តហោះដើម្បីជម្លៀសមនុស្សប្រហែល ៦០០ នាក់នៅតំបន់ដាច់ស្រយាលដែលរងការគំរាមកំហែងដោយភ្លើងឆេះព្រៃ។

រដ្ឋមន្ត្រីក្រសួងឆ្លើយតបបន្ទាន់ និងការស្តារសហគមន៍កាណាដា លោកស្រី Eleanor Olszewski បានប្រកាសនៅថ្ងៃទី ១៨ ខែកក្កដាអំពីការសម្រេចចិត្តជម្លៀសប្រជាជននៅក្នុងតំបន់ Fort Hope ភាគខាងត្បូងរដ្ឋ Ontario។
តំបន់ដែលមានប្រជាជនរស់នៅតិចតួចនេះ ដែលមានផ្លូវចូលផ្លូវថ្នល់តិចតួច និងពឹងផ្អែកយ៉ាងខ្លាំងលើការដឹកជញ្ជូនតាមផ្លូវអាកាស ក៏ជាកន្លែងដែលភ្លើងឆេះព្រៃដ៏ខ្លាំងក្លាបំផុតមួយចំនួនកំពុងកើតឡើងផងដែរ។ អាជ្ញាធរកាណាដាពីមុនបានជម្លៀសមនុស្សរាប់ពាន់នាក់ពីតំបន់ដែលរងផលប៉ះពាល់ទៅកាន់ទីក្រុងនានានៅភាគខាងត្បូងនៃរដ្ឋ Ontario។
ភ្លើងឆេះព្រៃទ្រង់ទ្រាយធំកើតឡើងជារៀងរាល់ឆ្នាំនៅក្នុងប្រទេសកាណាដា ដែលជាប្រទេសមួយក្នុងចំណោមប្រទេសដែលមានគម្របព្រៃឈើច្រើនជាងគេបំផុតនៅលើពិភពលោក។ អ្នកជំនាញអាកាសធាតុជឿថាសីតុណ្ហភាពកើនឡើងកំពុងធ្វើឱ្យឈើស្ងួត ដែលបង្កើនហានិភ័យនៃភ្លើងឆេះព្រៃ។
ក្រសួងថាមពល និងធនធានធម្មជាតិកាណាដាបានរាយការណ៍ពីភ្លើងឆេះព្រៃថ្មីចំនួន ៦៩ ករណីនៅថ្ងៃទី ១៨ ខែកក្កដា ដែលធ្វើឱ្យចំនួនសរុបកើនឡើងដល់ ៩៥៥។ ផ្ទៃដីសរុបដែលត្រូវបានដុតរហូតមកដល់ពេលនេះគឺប្រហែល ២៨.៥០០ គីឡូម៉ែត្រការ៉េ ដែលទាបជាងមធ្យមភាគប្រាំឆ្នាំ។
ទោះជាយ៉ាងណាក៏ដោយ ខ្យល់បានបក់ផ្សែងឆ្លងកាត់ព្រំដែនចូលទៅក្នុងសហរដ្ឋអាមេរិក ដែលជំរុញឱ្យមានការព្រមានអំពីសុខភាព និងគុណភាពខ្យល់នៅក្នុងតំបន់ជាច្រើន។ ប្រធានាធិបតី ដូណាល់ ត្រាំ បានអះអាងថា ភ្លើងឆេះព្រៃកាណាដាបានធ្វើឱ្យសហរដ្ឋអាមេរិកខាតបង់រាប់ពាន់លានដុល្លារ និងបានគំរាមកំហែងបង្កើនពន្ធលើប្រទេសជិតខាងរបស់គាត់។
បន្ទាប់ពីការអត្ថាធិប្បាយរបស់លោក ត្រាំ រដ្ឋមន្ត្រី Olszewski បាននិយាយថា ប្រទេសកាណាដាបានវិនិយោគជិត 8.6 ពាន់លានដុល្លារក្នុងការអភិរក្សព្រៃឈើ និងការបង្ការភ្លើងឆេះព្រៃចាប់តាំងពីឆ្នាំ 2020 ខណៈដែលប្រទេសនេះប្រឈមមុខនឹងអាកាសធាតុស្ងួត និងក្តៅជាងមុន៕

រូប​ថត​: Reuters