ក្លិប Newcastle United បានប្រកាសនៅថ្ងៃសុក្រថា បានចុះហត្ថលេខានាំយកខ្សែបម្រើ Aladji Bamba ពីក្លិបបារាំង AS Monaco ដោយចុះកិច្ចសន្យារយៈពេល 5 ឆ្នាំ។

យោងតាមសារព័ត៌មានអង់គ្លេស Newcastle នឹងចំណាយប្រាក់ដំបូងប្រមាណ 30 លានផោន (39.95 លានដុល្លារ) បូករួមនឹងប្រាក់លើកទឹកចិត្តបន្ថែម (add-ons) សម្រាប់កីឡាករវ័យ 20 ឆ្នាំ រូបនេះ។

Bamba គឺជាយុវជនដែលធំឡើងពីថ្នាលបណ្តុះបណ្តាលរបស់ AS Monaco។ គាត់បានបង្ហាញខ្លួនឱ្យក្រុមឈុតធំជាលើកដំបូងកាលពីឆ្នាំមុន ហើយបានលេងសរុប 25 ប្រកួត រួមទាំងការប្រកួតទាំងពីរជើងក្នុងវគ្គជម្រុះទៅកាន់វគ្គ 16 ក្រុមចុងក្រោយនៃ UEFA Champions League ទល់នឹង Paris Saint-Germain។

Bamba បាននិយាយថា៖ «ខ្ញុំពិតជារំភើបណាស់ដែលបានមកសាកល្បងខ្លួនឯងនៅលីគថ្មី ដែលជាលីគធំបំផុតនៅលើពិភពលោក។ ខ្ញុំបានរៀនអ្វីៗជាច្រើនកាលពីរដូវកាលមុន ហើយឥឡូវនេះខ្ញុំមានអារម្មណ៍ថា ខ្ញុំបានត្រៀមខ្លួនរួចរាល់សម្រាប់ឱកាសថ្មីនេះ។ ខ្ញុំនឹងប្រឹងប្រែងអស់ពីសមត្ថភាពដើម្បីក្លិបនេះ។»

Bamba គឺជាកីឡាករវ័យ ២០ ឆ្នាំ ឬក្មេងជាងនេះទី ៤ ហើយដែល Newcastle បានចុះកិច្ចសន្យានាំយកមកក្នុងរដូវក្ដៅនេះ។

ខ្សែបម្រើវ័យក្មេងសញ្ជាតិបារាំងរូបនេះ កាលពីរដូវកាលមុន បានបង្ហាញទម្រង់លេងយ៉ាងល្អនៅក្នុងលីគ Ligue 1 និងពានរង្វាន់ Champions League ហើយនឹងចូលរួមជាមួយអ្នកចាំទី Ewen Jaouen (អាយុ ២០ ឆ្នាំ) ដែលមកពី Reims, ខ្សែប្រយុទ្ធស្លាប Bazoumana Touré (អាយុ ២០ ឆ្នាំដូចគ្នា) ដែលមកពី Hoffenheim និងខ្សែបម្រើ Sean Steur (អាយុ ១៨ ឆ្នាំ) ដែលមកពី Ajax។

ក្នុងនាមជាកីឡាករដែលមានជំនាញធម្មជាតិក្នុងតួនាទីលេខ ៦ (ខ្សែបម្រើការពារ ឬតួនាទីស្នូលនៅតំបន់កណ្តាល) Bamba ត្រូវបានគេរំពឹងថានឹងប្រជែងជាមួយ Lewis Miley ដើម្បីដណ្តើមតួនាទីជាខ្សែបម្រើស្នូល ដែលនៅទំនេរក្រោយពេល Sandro Tonali បានចាកចេញទៅកាន់ Tottenham ក្នុងតម្លៃខ្លួនដំបូង ៩២,៥ លានផោន៕