ខេត្តព្រះវិហារ៖ លោកនាយឧត្តមសេនីយ៍ គន់ គីម អគ្គមេបញ្ជាការរង និងជានាយសេនាធិការចម្រុះ រួមនិងមេទ័ពខ្លាំងពូកែប្រចាំទិសប្រាសាទព្រះវិហារ  នៅព្រឹកថ្ងៃទី២៥ ខែកញ្ញា ឆ្នាំ២០១៦ បានធ្វើពិធីបួងសួងនៅទីកន្លែងដ៏ស័ក្តិសិទ្ធលើកំពូលប្រាសាទព្រះវិហារ ដើម្បីសុំសេចក្តីសុខសេចក្តីចម្រើនដល់កងទ័ពដ៏អង់អាចក្លាហានរបស់កម្ពុជាកំពុងឈរជើងការពារទឹកដី ជាពិសេសឲ្យកងទ័ពខ្មែរឈ្នះអស់មាសត្រូវ ។

លោកនាយឧត្តមសេនីយ៍ ជា តារា មេទ័ពប្រចាំទិសប្រាសាទព្រះវិហារបានបញ្ជាក់ប្រាប់ប្រភពព័ត៌មានថា ពិធីបួងសួងនេះត្រូវបានធ្វើឡើងតាមពិធីសាសនាដោយមានការរៀបចំបាយសី និងគ្រឿងសក្ការៈបូជា ជាច្រើនទៀត ។

លោកបានរំលឹកផងដែរថា កន្លែងធ្វើពិធីបួងសួងនាព្រឹកមិញ គឺជាកន្លែង ដែលសម្តេចតេជោ ហ៊ុន សែន នាយករដ្ឋមន្រ្តី នៃកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ធ្លាប់បានធ្វើពិធីបួងសួងកាលពីឆ្នាំ២០០៨ និងឆ្នាំ២០១០ អំឡុងពេលកងទ័ពថៃបានចូលមកឈ្លានពានទឹកដីកម្ពុជា។ ក្រោយពេលការបួងសួងពីសម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត បាននាំមកនូវសេចក្តីសុខក្សេមក្សាន្តដល់កងទ័ព និងបានធ្វើឲ្យប្រទេសកម្ពុជា បានឈ្នះលើកងទ័ពឈ្លានពានថៃទាំងនៅលើសមរភូមិ និងការតវ៉ាក្តីតាមផ្លូវច្បាប់ ។

បន្ទាប់ពីបានធ្វើពិធីបួងសួងហើយ នាយឧត្តមសេនីយ៍ គន់ គីម រួមនិងមេទ័ព នាយទាហាន នាយទាហាន រង ព្រមទាំងពលទាហាន បានចុះមកដាក់បិណ្ឌ រាប់បាត្រនៅក្នុងវត្តកែវសិក្ខាគិរីស្វារៈនាជើងភ្នំប្រាសាទព្រះវិហារ ដើម្បីឧទ្ទិសកុសលផលបុណ្យជូនដល់វិញ្ញាណក្ខន្ធកងកម្លាំងប្រដាប់ទាំងអស់ ដែលបានពលីជីវិតដើម្បីជាតិមាតុភូមិ និងបុព្វការីជនញាតិទាំង៧សន្តានដែលបានបានចែកឋាន ។

គួរបញ្ជាក់ថា តំបន់ព្រះសាទព្រះវិហារ រួមទាំងវត្តកែវសិក្ខាគិរីស្វារៈទីកន្លែង ដែលទាហានសៀមបានចូលឈ្លានពានកាលពីឆ្នាំ២០០៨ នោះ បច្ចុប្បន្នបាននិងកំពុងប្រែក្លាយមុខមាត់ថ្មីមានសេចក្តីសុខក្សេមក្សាន្ត និងមានភ្ញៀវទេសចរទៅទស្សនាកម្សាន្តជារៀងរាល់ថ្ងៃ ។

តំបន់ប្រាសាទព្រះវិហារ គឺជាទីកន្លែង ដែលបានចារឹកជាប្រវត្តិសាស្រ្តថ្មីមួយទៀត ក្នុងការតស៊ូរបស់កងទ័ពខ្មែរក្រោមការដឹកនាំ ដ៏អង់អាចក្លាហានរបស់សម្តេចតេជោ ហ៊ុន សែន ដោយបានប្រើទាំងយុទ្ធវិធីលើសមរភូមិ និង នយោបាយការបរទេស ដើម្បីការពារបូរណភាពទឹកដីខ្មែរពីសត្រូវឈ្លានពាន បន្តនូវស្នាព្រះហស្ថរបស់ព្រះបរមរតនកោដ្ឋ ព្រះបាទ នរោត្តម សីហនុ ដែលបានប្រឹងប្រែងតស៊ូ ក្តីលើឆាកអន្តរជាតិរហូតឈ្នះក្តីកាលពីឆ្នាំ១៩៦២កន្លងមកនោះ ៕

ដោយ៖ សហការី