ក្លិប Real Madrid បានដាក់សំណើបន្តកិច្ចសន្យាថ្មីឱ្យ Vinicius Junior ជាមួយប្រាក់ឈ្នួលប្រចាំឆ្នាំ 25 លានដុល្លារ ប៉ុន្តែចំនួននេះនៅតែទាបជាងប្រាក់ខែដែលខ្សែប្រយុទ្ធប្រេស៊ីលរូបនេះកំពុងទាមទារ។

 

ក្លិបយក្សអេស្ប៉ាញគ្រោងជួបភ្នាក់ងាររបស់ Vinicius ក្នុងសប្តាហ៍នេះ ដើម្បីបន្តការចរចាបន្ទាប់ពីការពន្យារពេលអស់ជាច្រើនខែ។

 

យោងតាមសារព័ត៌មាន ESPN ក្លិប Real Madrid បានដំឡើងសំណើប្រាក់ខែដល់ប្រហែល 25 លានដុល្លារក្នុងមួយឆ្នាំ ខណៈដែលក្រុមការងាររបស់ Vinicius កំពុងទាមទារប្រាក់ឈ្នួលប្រហែល 34 លានដុល្លារក្នុងមួយឆ្នាំ។

 

បច្ចុប្បន្ន Vinicius ទទួលបានប្រាក់ឈ្នួលប្រហែល 20 លានដុល្លារក្នុងមួយឆ្នាំ ហើយកិច្ចសន្យារបស់គាត់នៅសល់តែ 1 ឆ្នាំទៀតប៉ុណ្ណោះ។ ប្រសិនបើមិនអាចឈានដល់កិច្ចព្រមព្រៀងថ្មីបានទេ ខ្សែប្រយុទ្ធវ័យ 26 ឆ្នាំ អាចចាកចេញពី Santiago Bernabéu ដោយគ្មានតម្លៃខ្លួននៅរដូវក្តៅឆ្នាំក្រោយ ហើយចាប់ពីខែមករា ឆ្នាំ 2027 គាត់អាចចរចា និងចុះកិច្ចសន្យាជាមុនជាមួយក្លិបផ្សេងៗនៅអឺរ៉ុបបាន។

 

បច្ចុប្បន្ន Vinicius គឺជាកីឡាករដែលមានប្រាក់ឈ្នួលខ្ពស់ជាងគេលំដាប់ទី 2 នៅ Real Madrid បន្ទាប់ពី Kylian Mbappe ដែលទទួលបានប្រហែល 31.25 លានអឺរ៉ូ (36 លានដុល្លារ) ក្នុងមួយរដូវកាល។

 

Vinicius និងភ្នាក់ងាររបស់គាត់ចាត់ទុកការបន្តកិច្ចសន្យាលើកនេះថា ជាកិច្ចសន្យាសំខាន់បំផុតក្នុងអាជីពរបស់គាត់។ ពួកគេជឿជាក់ថា Real Madrid គួរតែផ្តល់តម្លៃសមរម្យចំពោះការរួមចំណែករបស់ Vinicius ចាប់តាំងពីចូលរួមជាមួយក្លិបក្នុងឆ្នាំ 2018 រួមទាំងការស៊ុតបញ្ចូលទីក្នុងវគ្គផ្តាច់ព្រ័ត្រ UEFA Champions League ពីរលើក៖

ឈ្នះ Liverpool 1-0 ក្នុងឆ្នាំ 2022

ឈ្នះ Borussia Dortmund 2-0 ក្នុងឆ្នាំ 2024។

 

ESPN ក៏បានរាយការណ៍ថា ប្រសិនបើភាគីទាំងពីរមិនអាចឈានដល់កិច្ចព្រមព្រៀងបាន Real Madrid ក៏ត្រៀមលក់ Vinicius នៅរដូវក្តៅនេះដែរ។ ក្លិបរំពឹងថា អាចទទួលបានតម្លៃផ្ទេរប្រហែល 171 លានដុល្លារ ទោះបីជាកីឡាករនៅសល់កិច្ចសន្យាត្រឹមមួយឆ្នាំក៏ដោយ។

 

ក្លិប Arsenal កំពុងតាមដានស្ថានការណ៍នេះយ៉ាងជិតស្និទ្ធ ប៉ុន្តែមិនទាន់ដាក់សំណើជាផ្លូវការនៅឡើយ ដោយយល់ថា Real Madrid នៅតែផ្តល់អាទិភាពក្នុងការរក្សាទុកតារាឆ្នើមរូបនេះ។

 

បន្ទាប់ពីបញ្ចប់ការសម្រាកក្រោយការប្រកួត World Cup ខ្សែប្រយុទ្ធ Vinicius បានត្រឡប់មកចូលរួមជាមួយក្រុមវិញនៅសប្តាហ៍នេះ។ ខ្សែប្រយុទ្ធវ័យ 26 ឆ្នាំបានឆ្លងកាត់ការពិនិត្យសុខភាពមុនរដូវកាលដោយជោគជ័យ និងបានចូលហ្វឹកហាត់ជាលើកដំបូងក្រោមការដឹកនាំរបស់អ្នកចាត់ការថ្មី Jose Mourinho។

 

ក្នុងទីផ្សារដោះដូរកីឡាកររដូវក្តៅឆ្នាំ 2026 នេះ Real Madrid បានចុះហត្ថលេខាលើកីឡាករថ្មីចំនួន 5 នាក់ រួមមាន៖

Carlos Espi

Ibrahima Konate

Denzel Dumfries

Bernardo Silva

Marc Cucurella។

 

លើសពីនេះ ក្លិបក៏បានឈានដល់កិច្ចព្រមព្រៀងក្នុងការផ្ទេរខ្សែប្រយុទ្ធស្លាបវ័យក្មេង Yan Diomande ពី RB Leipzig ក្នុងតម្លៃរហូតដល់ 150 លានដុល្លារ។ ទោះជាយ៉ាងណា ការផ្ទេរនេះត្រូវបានផ្អាកជាបណ្តោះអាសន្ន ដោយសារតែមានជម្លោះផ្លូវច្បាប់រវាងតំណាងរបស់កីឡាករជនជាតិកូតឌីវ័ររូបនេះ៕