ភ្នំពេញ៖ ថវិកាប្រមាណ៤៦០០ដុល្លារ បានមកពីកម្មវិធីតន្រ្តីសប្បុរសធម៌ដែលសហការដោយក្រុមសិល្បករនៃក្រុមតារាកម្ពុជានិងសាកលវិទ្យាល័យន័រតុន ត្រូវបានប្រគល់ជូនមន្ទីរពេទ្យគន្ធបុប្ផា។ កម្មវិធីនេះត្រូវបានធ្វើឡើងកាលពីល្ងាចថ្ងៃទី២៦ ខែកញ្ញា ឆ្នាំ២០១៦នេះ នៅក្នុងបរិវេណមន្ទីរពេទ្យគន្ធបុប្ផា៤ ជិតរមណីយដ្ឋានវត្តភ្នំ ក្រោមវត្តមានផលិតករ សិល្បករតំណាងសប្បុរសជនជាដើម។
សិល្បករដែលបានចូលរួមកម្មវីធីនេះរួមមាន លោក កុយ ស៊ីឌឿន កញ្ញា ទេព បូព្រឹក្ស, កញ្ញា ពេជ្រ អាវីហ្សា, កញ្ញា ស្រីពៅ មុខឈើ, កញ្ញា ថនស្រីណៃ,អ្នកនាង មាស សម្ផស្ស, អ្នកនាង ស៊ុន ណារីម៉ូនីកា អ្នកនាង ប៉េង ប៉ោង លោកគន់ រៀមរតនៈ និងតារាល្បីៗជាច្រើននាក់ទៀតបានប្រគល់ថវិការបស់មូលនិធិនិស្សិតពេទ្យន័រតុនចំនួន៤៦៩៤ដុល្លារ ជូនដល់មន្ទីរពេទ្យគន្ធបុប្ផា នារសៀលថ្ងៃទី២៦ ខែកញ្ញា ឆ្នាំ២០១៦ នេះ នៅមន្ទីរពេទ្យគន្ធបុប្ផាទី៤ ជិតវត្តភ្នំ។ ថវិកាដែលតារាល្បីៗបានប្រគល់ជូនដល់មន្ទីរពេទ្យគន្ធបុប្ផានោះគឺបានមកពីមូលនិធិរបស់និស្សិតពេទ្យនៅសាកលវិទ្យាល័យន័រតុន ដែលរៃអង្គាសពីការរៀបចំកម្មវិធីតន្រ្តីសប្បុរសធម៌ កាលពីថ្ងៃទី១៧ ខែកញ្ញា ឆ្នាំ២០១៦ ។
ទោះជាយ៉ាងណា តំណាងក្រុមការងាររៀបចំកម្មវិធីសប្បុរសធម៌ កាលពីថ្ងៃទី១៧ ខែកញ្ញា កន្លងមកនេះ លោក ផាត់ តារារដ្ឋ បានសម្តែងការសោកស្តាយ ដែលថវិកាទទួលបានលើកនេះ មិនបានច្រើនតាមការរំពឹងទុក ដោយសារតែមានភ្លៀង នៅពេលរៀបចំកម្មវិធី។ តែក្រុមការងារ បានប្រកាសថា កម្មវិធីសប្បុរសធម៌មួយនេះ នឹងរៀបចំជាថ្មីម្តងទៀត នៅខែមេសា ឆ្នាំ២០១៧ ដោយកម្មវិធីគ្រោងរៀបចំនៅពេលខាងមុខនេះ មានទ្រង់ទ្រាយធំជាងមុន និងមានការចូលរួមពីសិល្បករ សិល្បការិនីល្បីៗជាច្រើននាក់ចូលរួមផងដែរ៕
កញ្ញា ទេព បូព្រឹក្សតារាចម្រៀងពេញនិយមក្នុងស្រទាប់យុវវ័យបានបង្ហាញចំណាប់អារម្មណ៍ថា កញ្ញាបានចូលរួមសកម្មភាពមនុស្សធម៌បានច្រើនដងមកហើយដោយនេះជាឱកាសទី១បានចូលរួមសហការជាមួយក្រុមនិស្សិតពេទ្យន័រតុនដើម្បីរៃអង្គាសប្រាក់ជួយមន្ទីរពេទ្យគន្ឋបុប្ជា។បើទោះកាលពីពេលប្រគុំតន្ត្រីនាងត្រូវសម្តែងទាំងភ្លៀងក៏ពេញចិត្តជួយពេញទំហឹងឲ្យតែពាក់ព័ន្ធនឹងការជួយកុមារកម្ពុជាជាច្រើនដែលត្រូវការការព្យាបាលពីមន្ទីរពេទ្យនេះខណៈដែលមន្ទីរពេទ្យនៅមានការខ្វះខាតផ្នែកថវិកានោះ។
តំណាងក្រុមគ្រូពេទ្យដែលបានចូលរួមទទួលថវិកាពីសិល្បករនិងនិស្សិតពេទ្យបានបញ្ជាក់ដែរថា មន្ទីរពេទ្យគន្ធបុប្ជានៅតែត្រូវការថវិកាជាចាំបាច់ជួយដល់កុមារដែលមកព្យាបាលជំងឺមានគ្រប់ទិសទី។ នេះជាទឹកចិត្តមួយដែលសិល្បករខ្មែរបានរួមគ្នារិះរកគំនិតល្អៗជួយសង្គមមិនត្រឹមតែជាអ្នកផ្តល់ក្តីសប្បាយ នោះទេសូម្បីតែការងារមនុស្សធម៌ក៏មានទឹកចិត្តជួយគ្នា។ ខាងមន្ទីរពេទ្យសូមសរសើរដល់តារាទាំងអស់ក៍ដូចជាអរគុណដល់សាកលវីទ្យាល័យន័រតុននិងអ្នករៀបចំកម្មវិធីទាំងមូលដែលបាននាំជំនួយជាថវិកាសម្រាប់ជួយទ្រទ្រង់មន្ទីរពេទ្យនេះ៕
ដោយ៖ វឌ្ឍនា
