ភ្នំពេញ៖ នៅក្នុងពិធីបើកវិញ្ញាសាប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ១០-១១ សីហា ២០២៦ ក្រោមអធិបតីភាព លោកបណ្ឌិតសភាចារ្យ ហង់ ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក.) នៅមណ្ឌលវិទ្យាល័យព្រះស៊ីសុវត្ថិ នាព្រឹកថ្ងៃទី ១០ ខែសីហា ឆ្នាំ២០២៦។ អញ្ជើញមានវត្តមាននាឱកាសនោះរួមមាន លោក លោកស្រី តំណាងស្ថាប័នពាក់ព័ន្ធ រួមមានអង្គភាពប្រឆាំងអំពើពុករលួយ រដ្ឋបាលរាជធានីភ្នំពេញ ព្រមទាំងវត្តមានអ្នកសារព័ត៌មានជាច្រើនរូប។
សូមជម្រាបជូនថា ស.ស.យ.ក. តែងតែចូលរួមគាំទ្រវិស័យអប់រំនៅកម្ពុជា ជាពិសេសកំណែទម្រង់ចាប់តាំងពីឆ្នាំ២០១៤ តាមរយៈការចូលរួមជាមួយក្រសួងអប់រំ យុវជន និងកីឡា និងមន្ទីរអប់រំ រាជធានី-ខេត្ត ដើម្បីរៀបចំវគ្គបំប៉នជូនសិស្សានុសិស្សដែលត្រៀមប្រឡងសញ្ញាបត្រមធ្យមសិក្សាទុតិយភូមិ។
លើសពីនេះថែមទៀត ស.ស.យ.ក. បានចូលរួមសង្កេតការណ៍ដំណើរការប្រឡង និងជួយសម្របសម្រួលដល់បេក្ខជនប្រឡង ដូចជា ផ្តល់ទីកន្លែងស្នាក់នៅ ផ្ញើកង់ ម៉ូតូ ចែកទឹក ដើម្បីផ្តល់ជាកម្លាំងចិត្តដល់ប្អូនៗដែលត្រូវប្រឡង។
ក្នុងនាមក្រុមគ្រួសារ ស.ស.យ.ក. លោក ហ៊ុន ម៉ានី សូមជូនពរប្អូនៗបេក្ខជន បេក្ខនារីទាំងអស់ ឱ្យមានស្មារតីរឹងមាំ ប្រកបដោយទំនុកចិត្ត និងទទួលបានជោគជ័យក្នុងការប្រឡង ព្រមទាំងសម្រេចបាននិទ្ទេសល្អប្រសើរគ្រប់ៗគ្នា!
ដោយ៖តារា
