ភ្នំពេញ ៖ មន្ត្រីនគរបាលចរាចរណ៍ ស័ក្តិ៣ ឈ្មោះ ហោ ផល្លី ត្រូវផ្អាកការងារ និងមន្ត្រីកិច្ចសន្យាឈ្មោះ ស៊ឹម រដ្ឋា នឹងត្រូវបណ្តេញចេញពីការងារ រឿងជំរិតទារប្រាក់៥០០ដុល្លារ ពីជនបរទេស ។
ករណីនេះកើតឡើងនៅគោលដៅផ្លូវម៉ៅសេទុង នៅពេលជនបរទេសទាំង២នាក់ ធ្វើដំណើរទើបត្រឡប់ពីខេត្តកំពត។
សម្រាប់លុយ៥០០ដុល្លារ ដែលយកពីជនបរទេសនោះ នឹងត្រូវប្រគល់ជូនពួកគាត់វិញ ។
សូមជម្រាបថា លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហា ផ្ទៃបានចេញបទបញ្ជាឱ្យមន្ត្រីជំនាញចុះស្រាវជ្រាវ និងស៊ើបអង្កេតក្នុងករណីផ្សព្វផ្សាយថា ប៉ូលិសចរាចរណ៍ ទារលុយពីជនបរទេស៥០០ដុល្លារ ដែលបានធ្វើដំ ណើរពីខេត្តកំពតមករាជធានីភ្នំពេញ ។
លោក ទូច សុឃៈ អ្នកនាំ ពាក្យរងក្រសួងមហាផ្ទៃ បានឲ្យដឹងថា បន្ទាប់ពីមានបណ្តាញទំនាក់ទំនងសង្គមហ្វេសប៊ុកបានផ្សាយថា មានជនបរទេសបុរស-នារី ២នាក់ បានធ្វើដំណើរមកពីខេត្តកំពត ដើម្បីចូលរាជធានីភ្នំពេញ ប៉ុន្តែត្រូវបានប៉ូលិសចរាចរណ៍ តម្រូវឱ្យបង់ប្រាក់ចំនួន៥០០ដុល្លារ ទោះបីជាជនបរទេសទាំង២នាក់នេះ មានត្រឹម១៣៨ដុល្លារក្នុងប៉ុណ្ណោះ ក៏ត្រូវឱ្យបង់លុយដែរ បើទោះជាពួកគាត់ទាំង២នាក់ យំសូមអង្វករក៏ដោយ ក៏មិនលើកលែងដែរ ។
លោក ទូច សុឃៈ បានឱ្យដឹងនៅថ្ងៃទី៣១ ខែសីហា ឆ្នាំ២០២៦ យ៉ាងដូច្នេះថា ៖ “ចំពោះភាពមិនប្រក្រតីណា មួយកើត ឡើងពីមន្ត្រីនគរបាលចរាចរណ៍ នៅតាមគ្រប់គោលដៅនៅទូទាំងប្រទេស គឺមិនផុតពីក្រសែភ្នែករបស់ឯកឧត្តម ស សុខា ឡើយ ។ ជាក់ស្តែង ករណីមានការផ្សព្វផ្សាយកាលពីថ្ងៃទី៣០ ខែសីហា ឆ្នាំ២០២៦ មកនេះ ក្រោយទទួលបានព័ត៌មានប្រមុខមហាផ្ទៃ បានចេញបទបញ្ជាឱ្យមន្ត្រីជំនាញចុះស្រាវជ្រាវរកហេតុផលភ្លាមៗតែម្តង” ។
អ្នកនាំពាក្យបញ្ជាក់ថា ៖ “ចំពោះការផ្សព្វផ្សាយថា ជនបរទេសរងនូវការផាកពិន័យ ដោយនគរបាលចរាចរណ៍ និងមន្ត្រីពាក់ព័ន្ធនៅក្នុងរាជធានីភ្នំពេញ ក្រសួងមហាផ្ទៃ បានដាក់ចេញនូវគោលការណ៍យ៉ាងម៉ឹងម៉ាត់ជាទីបំផុត ដែលឯកឧត្តមអភិសន្តិបណ្ឌិត ស សុខា បានដាក់បទបញ្ជាឱ្យពិនិត្យស្រាវជ្រាវឱ្យបានឌិតដល់បំផុត ក្នុងក្របខណ្ឌ ដែលពាក់ព័ន្ធទៅនឹងមន្ត្រីនគរបាលចរាចរណ៍ ត្រូវតែយកបទពិន័យនគរបាលជាតិ មកអនុវត្ត ហើយនឹងអនុវត្តទៅតាមច្បាប់” ។
លោក ទូត សុឃៈ បន្តថា បើសិនជាករណីនេះ មានការជាក់ពាក់ព័ន្ធជាមួយមន្ត្រីជាប់កិច្ចសន្យា ដែលជួយការងារដល់មន្ត្រីចរាចរណ៍ ត្រូវតែបញ្ចប់ការងារ ហើយថែមទាំងពិនិត្យទៅលើទិដ្ឋភាពច្បាប់ថែម ទៀតផង ។
អ្នកនាំពាក្យបានសង្កត់ធ្ងន់ថា ជាធម្មតាការអនុវត្តច្បាប់ចរាចរណ៍ផ្លូវគោក នឹងត្រូវអនុវត្តតាមចាប់ពីថ្ងៃទី១ ខែកញ្ញា ឆ្នាំ២០២៦។ ដូច្នេះរាល់ការផាកពិនិត្យផ្សេងៗខុសពីគោលការណ៍ និងលើសពីការកំណត់របស់ច្បាប់ គឺជាការល្មើសច្បាប់ ដែលត្រូវអនុវត្តទៅតាមវិន័យរបស់កងកម្លាំងនគរបាលជាតិ និងតាមច្បាប់ជាដាច់ខាត ៕
