អ៊ីរ៉ង់កំពុងទាមទារសំណងពីសហរដ្ឋអាមេរិកសម្រាប់ការខាតបង់ក្នុងសង្គ្រាម និងការដកទ័ពចេញពីតំបន់នេះ បន្ទាប់ពីមានភាពតានតឹងអស់រយៈពេលជាច្រើនខែ។

អ្នកនាំពាក្យយោធាអ៊ីរ៉ង់ លោក Mohammad Akraminia បានថ្លែងថា រដ្ឋបាលអាមេរិកត្រូវតែផ្តល់សំណងពេញលេញសម្រាប់ការខូចខាតដែលបង្កឡើងដល់ប្រទេសនៅមជ្ឈិមបូព៌ា ដោយសារសង្គ្រាមដែលទីក្រុងវ៉ាស៊ីនតោនបានចាប់ផ្តើម និងដកកងកម្លាំងយោធារបស់ខ្លួនចេញពីតំបន់នេះ ព្រោះនេះជាដំណោះស្រាយសមហេតុផលបំផុតសម្រាប់ទីក្រុងវ៉ាស៊ីនតោន។
លោក Akraminia បានសរសេរនៅលើបណ្តាញសង្គមថា “ដំណោះស្រាយសមហេតុផលសម្រាប់សហរដ្ឋអាមេរិកគឺត្រូវទទួលស្គាល់ការពិត ទូទាត់សងសម្រាប់ការខូចខាត និងចាកចេញពីតំបន់នេះ។ នេះនឹងធានាសន្តិសុខនៅក្នុងតំបន់ និងនាំមកនូវវិបុលភាពកាន់តែច្រើនដល់ប្រជាជនអាមេរិក”។
លោក Akraminia បានអះអាងថា បញ្ហាទាំងអស់ដែលយោធាអាមេរិកកំពុងប្រឈមមុខនៅក្នុងតំបន់ ក៏ដូចជាការលំបាកដែលប្រជាជនអាមេរិកកំពុងប្រឈមមុខ គឺកើតចេញពីកំហុសរបស់ទីក្រុងវ៉ាស៊ីនតោនក្នុងសកម្មភាពឈ្លានពានរបស់ខ្លួនប្រឆាំងនឹងអ៊ីរ៉ង់។
អ្នកនាំពាក្យយោធាអ៊ីរ៉ង់ម្នាក់បាននិយាយថា នៅក្នុងការវាយប្រហារតាមអាកាសសងសឹកដែលកំណត់គោលដៅមូលដ្ឋានយោធាអាមេរិកនៅមជ្ឈិមបូព៌ា ទីក្រុងតេអេរ៉ង់បានប្រើប្រាស់មីស៊ីលផ្លោង និងយន្តហោះគ្មានមនុស្សបើកដែលបំពាក់ដោយបច្ចេកវិទ្យាបញ្ញាសិប្បនិម្មិត (AI)។
លោកបាននិយាយនៅលើកញ្ចក់ទូរទស្សន៍រដ្ឋអ៊ីរ៉ង់ថា «នៅក្នុងប្រតិបត្តិការចុងក្រោយបំផុតប្រឆាំងនឹងសត្រូវរបស់យើង យើងបានប្រើប្រាស់មីស៊ីល Fath ពីដីទៅដី និងយន្តហោះគ្មានមនុស្សបើក Arash-2 ដែលបំពាក់ដោយបញ្ញាសិប្បនិម្មិត» ។
យោងតាមតំណាងយោធាអ៊ីរ៉ង់ កងកម្លាំងប្រដាប់អាវុធរបស់ប្រទេសនេះកំពុងធ្វើការវាយប្រហារសងសឹក «ក្នុងលក្ខណៈរួមបញ្ចូលគ្នា និងមិនស៊ីមេទ្រី ដែលធ្វើឱ្យវាងាយស្រួលក្នុងការវាយប្រហារគោលដៅ»។
លោក Akraminia បានកត់សម្គាល់ថា ទីក្រុងតេអេរ៉ង់មិនបានច្រានចោលលទ្ធភាពនៃការធ្វើការវាយប្រហារជាមុនទេ ប្រសិនបើមានការគំរាមកំហែងកើតឡើង ហើយបានព្រមានអ៊ីស្រាអែលថា ការឆ្លើយតបរបស់អ៊ីរ៉ង់ចំពោះសកម្មភាពឈ្លានពានថ្មីណាមួយនឹង «រហ័ស និងខ្លាំងក្លា»៕

រូប​ថត​: Reuters