លោក Michael Dell ស្ថាបនិក និងជានាយកប្រតិបត្តិក្រុមហ៊ុន Dell Technologies បានក្លាយជាមហាសេដ្ឋីមានទ្រព្យសម្បត្តិច្រើនបំផុតទី២លើពិភពលោកជាលើកដំបូង បន្ទាប់ពីតម្លៃភាគហ៊ុនរបស់ក្រុមហ៊ុនបានកើនឡើងយ៉ាងខ្លាំង ដែលធ្វើឱ្យទ្រព្យសម្បត្តិរបស់លោកកើនឡើងជាងទ្វេដងក្នុងឆ្នាំនេះ។

យោងតាមទស្សនាវដ្តី Forbes ទ្រព្យសម្បត្តិសុទ្ធរបស់លោក Dell ត្រូវបានប៉ាន់ប្រមាណថាមានចំនួន 273.2 ពាន់លានដុល្លារ គិតត្រឹមថ្ងៃទី៩ ខែកញ្ញា ដែលកើនឡើងប្រមាណ 132 ពាន់លានដុល្លារ ពីចំនួន 141 ពាន់លានដុល្លារនៅដើមឆ្នាំ។ ការកើនឡើងនេះបានធ្វើឱ្យលោកឡើងលើសសហស្ថាបនិក Google លោក Larry Page ហើយស្ថិតនៅពីក្រោយតែលោក Elon Musk នាយកប្រតិបត្តិក្រុមហ៊ុន Tesla ប៉ុណ្ណោះ។

មហាសេដ្ឋីវ័យ 61 ឆ្នាំរូបនេះ បានឡើងមកកាន់ចំណាត់ថ្នាក់ទី៣កាលពីមួយថ្ងៃមុន បន្ទាប់ពីវ៉ាដាច់ស្ថាបនិក Amazon លោក Jeff Bezos។ បន្ទាប់មក លោកបានឡើងមួយចំណាត់ថ្នាក់ទៀត ខណៈភាគហ៊ុនរបស់ Dell Technologies បន្តកើនឡើងដល់កម្រិតកំណត់ត្រាថ្មី។

នៅថ្ងៃទី៩ ខែកញ្ញា ភាគហ៊ុន Dell Technologies បានកើនឡើង 4% ដល់កម្រិតខ្ពស់បំផុតក្នុងអំឡុងការជួញដូរ គឺ 555.31 ដុល្លារក្នុងមួយភាគហ៊ុន។ ការកើនឡើងនេះបានបន្ថែមប្រហែល 6.3 ពាន់លានដុល្លារ ទៅក្នុងទ្រព្យសម្បត្តិរបស់លោក Dell ក្នុងព្រឹកនោះ។ លោកកាន់កាប់ភាគហ៊ុនប្រហែល 40% នៃក្រុមហ៊ុន។

ភាគហ៊ុន Dell Technologies បានកើនឡើងជាង 300% ចាប់តាំងពីដើមឆ្នាំ ខណៈក្រុមហ៊ុនផលិតម៉ាស៊ីនមេធំបំផុតលើពិភពលោកមួយនេះ កំពុងក្លាយជាអ្នកទទួលផលប្រយោជន៍សំខាន់ពីការរីកចម្រើននៃហេដ្ឋារចនាសម្ព័ន្ធបញ្ញាសិប្បនិម្មិត (AI) ទូទាំងពិភពលោក។

ក្រុមហ៊ុនដែលធ្លាប់ត្រូវបានគេស្គាល់ជាចម្បងដោយសារកុំព្យូទ័រផ្ទាល់ខ្លួន (PC) បានវិវត្តទៅជាអ្នកផ្គត់ផ្គង់ដ៏សំខាន់នូវ ម៉ាស៊ីនមេ ប្រព័ន្ធផ្ទុកទិន្នន័យ និងឧបករណ៍បណ្តាញ ដែលត្រូវការសម្រាប់ការអភិវឌ្ឍ និងដំណើរការប្រព័ន្ធ AI។

យោងតាម Fortune Dell Technologies បានកត់ត្រាការបញ្ជាទិញម៉ាស៊ីនមេសម្រាប់ AI ក្នុងត្រីមាសចុងក្រោយចំនួន 60.9 ពាន់លានដុល្លារ ដែលជាកំណត់ត្រាថ្មី។ ក្រុមហ៊ុនរកបានចំណូលពីម៉ាស៊ីនមេ AI ចំនួន 16.4 ពាន់លានដុល្លារ និងបញ្ចប់ត្រីមាសជាមួយបញ្ជីការបញ្ជាទិញដែលមិនទាន់បានបំពេញ (backlog) ចំនួន 95 ពាន់លានដុល្លារ ដែលជាកំណត់ត្រាថ្មីផងដែរ។

ចំណូលសរុបប្រចាំត្រីមាសរបស់ក្រុមហ៊ុនក៏បានកើនដល់កំណត់ត្រា 47 ពាន់លានដុល្លារ កើនឡើង 58% បើធៀបនឹងរយៈពេលដូចគ្នាកាលពីឆ្នាំមុន ខណៈប្រាក់ចំណេញក្នុងមួយភាគហ៊ុនដែលបានកែសម្រួល (adjusted EPS) បានកើនឡើងជាងបីដង ដល់ 7.04 ដុល្លារ។

ការកើនឡើងយ៉ាងខ្លាំងនៃទ្រព្យសម្បត្តិរបស់លោក Dell បានធ្វើឱ្យលោកវ៉ាដាច់មហាសេដ្ឋីល្បីៗជាច្រើនក្នុងវិស័យបច្ចេកវិទ្យា រួមមាន Larry Page, Jeff Bezos, សហស្ថាបនិក Google លោក Sergey Brin, នាយកប្រតិបត្តិ Meta លោក Mark Zuckerberg និងស្ថាបនិក Oracle លោក Larry Ellison។

ពីអាជីវកម្មតូចមួយទៅជាក្រុមហ៊ុនបច្ចេកវិទ្យាយក្ស

ការឡើងមកកាន់ចំណាត់ថ្នាក់កំពូលនេះ គឺជាជំពូកថ្មីមួយទៀតក្នុងការផ្លាស់ប្តូររបស់ក្រុមហ៊ុនដែលលោក Dell បានបង្កើតឡើងនៅឆ្នាំ 1984 នៅពេលលោកមានអាយុត្រឹម 19 ឆ្នាំ និងកំពុងសិក្សានៅសាកលវិទ្យាល័យ Texas ដោយមានដើមទុនដំបូងត្រឹម 1,000 ដុល្លារ។

បន្ទាប់ពីក្លាយជាក្រុមហ៊ុនផលិតកុំព្យូទ័រផ្ទាល់ខ្លួនឈានមុខគេមួយរបស់ពិភពលោក លោក Dell បាននាំក្រុមហ៊ុនចេញពីទីផ្សារភាគហ៊ុនក្នុងឆ្នាំ 2013។

បីឆ្នាំបន្ទាប់មក Dell បានបញ្ចប់ការទិញយកក្រុមហ៊ុន EMC ដែលជាក្រុមហ៊ុនធំក្នុងវិស័យផ្ទុកទិន្នន័យ ក្នុងតម្លៃ 67 ពាន់លានដុល្លារ។ នៅពេលនោះ វាជាការទិញយកក្រុមហ៊ុនក្នុងវិស័យបច្ចេកវិទ្យាដែលមានតម្លៃខ្ពស់បំផុតក្នុងប្រវត្តិសាស្ត្រ។

កិច្ចព្រមព្រៀងនេះបានពង្រីកវត្តមានរបស់ Dell Technologies យ៉ាងខ្លាំងក្នុងវិស័យ ប្រព័ន្ធផ្ទុកទិន្នន័យសម្រាប់សហគ្រាស និងហេដ្ឋារចនាសម្ព័ន្ធទិន្នន័យ ដែលកាន់តែមានសារៈសំខាន់ ខណៈក្រុមហ៊ុនជាច្រើនកំពុងចំណាយប្រាក់រាប់ពាន់លានដុល្លារលើបច្ចេកវិទ្យា AI។

Dell Technologies បានត្រឡប់មកចុះបញ្ជីជាក្រុមហ៊ុនសាធារណៈនៅលើទីផ្សារភាគហ៊ុនវិញក្នុងឆ្នាំ 2018។

ទ្រព្យសម្បត្តិរបស់ Dell មិនមានតែភាគហ៊ុន Dell Technologies

ទ្រព្យសម្បត្តិរបស់លោក Dell មិនមែនមានតែការកាន់កាប់ភាគហ៊ុនប្រហែល 40% ក្នុង Dell Technologies ប៉ុណ្ណោះទេ។ ទ្រព្យសម្បត្តិមួយផ្នែកធំរបស់លោកត្រូវបានកាន់កាប់តាមរយៈក្រុមហ៊ុនវិនិយោគឯកជន DFO Management។

លោកក៏កាន់កាប់ភាគហ៊ុនមានតម្លៃរាប់ពាន់លានដុល្លារនៅក្នុងក្រុមហ៊ុនផលិតបន្ទះឈីប Broadcom ដែលជាក្រុមហ៊ុនមួយទៀតកំពុងទទួលផលប្រយោជន៍យ៉ាងខ្លាំងពីការរីកចម្រើននៃហេដ្ឋារចនាសម្ព័ន្ធ AI។

លោក Michael Dell និងភរិយា Susan ក៏បានបរិច្ចាគប្រាក់រាប់ពាន់លានដុល្លារដល់សកម្មភាពសប្បុរសធម៌ផងដែរ។ Forbes បានចាត់ចំណាត់ថ្នាក់អ្នកទាំងពីរជាលេខ 16 ក្នុងចំណោមអ្នកសប្បុរសធម៌ចិត្តទូលាយបំផុតនៅអាមេរិកក្នុងឆ្នាំ 2026 ដោយប៉ាន់ប្រមាណថា ពួកគេបានបរិច្ចាគប្រាក់សរុបប្រមាណ 3.3 ពាន់លានដុល្លារ ក្នុងរយៈពេលពេញមួយជីវិត៕