ភ្នំពេញ÷ អាជ្ញាធរកម្ពុជាបានសម្រេចបណ្ដេញជនបរទេសខុសច្បាប់ជាជនជាតិចិនសរុបចំនួន ១៦៤នាក់ (ក្នុងនោះមានស្ត្រីម្នាក់) ឱ្យចាកចេញពីទឹកដីកម្ពុជាត្រឡប់ទៅប្រទេសកំណើតវិញ តាមរយៈយន្តហោះពិសេស នៅប៉ុស្តិ៍នគរបាលច្រកទ្វារអាកាសយានដ្ឋានអន្តរជាតិតេជោ។ ប្រតិបត្តិការដ៏តឹងរ៉ឹងនេះ ត្រូវបានអគ្គនាយកដ្ឋានអន្តោប្រវេសន៍បញ្ជាក់ឱ្យដឹងតាមទំព័រហ្វេសប៊ុកផ្លូវការ កាលពីរាត្រីថ្ងៃទី២០ ខែកញ្ញា ឆ្នាំ២០២៦ នេះ។

ចំណាត់ការផ្លូវច្បាប់របស់នាយកដ្ឋានស៊ើបអង្កេត និងអនុវត្តនីតិវិធី ត្រូវបានធ្វើឡើងភ្លាមៗ បន្ទាប់ពីការស្រាវ ជ្រាវបង្ហាញថា ក្រុមជនសង្ស័យទាំងនោះបានលួចឆ្លងដែន និងស្នាក់នៅធ្វើការដោយគ្មានការអនុញ្ញាត ព្រមទាំងមានការពាក់ព័ន្ធនឹងការប្រើប្រាស់សារធាតុញៀន និងការប្រព្រឹត្តអំពើឆបោកតាមប្រព័ន្ធបច្ចេកវិទ្យា (Online Scams) យ៉ាងខុសច្បាប់នៅក្នុងប្រទេសកម្ពុជា។

ការអនុវត្តវិធានការច្បាប់យ៉ាងក្ដៅគគុកនេះ ឆ្លុះបញ្ចាំងពីការអនុវត្តបទបញ្ជាយ៉ាងម៉ឺងម៉ាត់បំផុតរបស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ដែលធ្លាប់បានប្រកាសជំហរយ៉ាងម៉ឺងម៉ាត់ថា កម្ពុជាដាច់ខាតមិនបណ្តោយឱ្យក្រុមឧក្រិដ្ឋជន ឬជនទុច្ចរិតណាម្នាក់ យកទឹកដីរបស់ខ្លួនធ្វើជាមូលដ្ឋានប្រព្រឹត្តបទល្មើសឆបោក ឬបង្កអសន្តិសុខដល់តំបន់ និងពិភពលោកឡើយ៕

ដោយ៖ សុរិយា