ខ្សែប្រយុទ្ធ Kylian Mbappe របស់ក្រុមជម្រើសជាតិបារាំង នឹងត្រូវចាកចេញពីជំរំហ្វឹកហាត់របស់ក្រុម បន្ទាប់ពីរងរបួសជង្គង់ និងត្រូវបានប្តូរចេញភ្លាមៗ ក្រោយស៊ុតបញ្ចូលទីគ្រាប់ជ័យជម្នះទល់នឹងតួកគី ក្នុងការប្រកួត Nations League កាលពីថ្ងៃសុក្រ។
ប្រធានក្រុមរូបនេះបានទទួលការព្យាបាលភ្លាមៗ បន្ទាប់ពីស៊ុតបញ្ចូលទី ហើយបានត្រឡប់ចូលទីលានវិញមួយរយៈខ្លី។ ប៉ុន្តែប្រហែលមួយនាទីក្រោយមក រូបគេបានដួលម្តងទៀត និងមិនអាចបន្តការប្រកួតបានឡើយ ដែលបង្ខំឱ្យគ្រូបង្វឹក Zinedine Zidane ធ្វើការផ្លាស់ប្តូរកីឡាករនៅនាទីទី៥៨ ក្នុងការប្រកួតដំបូងរបស់លោកក្នុងតំណែងជាគ្រូបង្វឹក។
លោក Zidane បាននិយាយអំពីកីឡាកររបស់ក្លិប Real Madrid វ័យ ២៧ ឆ្នាំរូបនេះថា៖ «ជាអកុសល ស្ថានភាពមើលទៅមិនសូវល្អទេ។ ខ្ញុំគិតថា គេត្រូវត្រឡប់ទៅវិញ។ យើងនឹងមិនប្រថុយប្រថានឡើយ។ ជង្គង់របស់គេមានការហើម។ ស្ថានភាពនេះមិនមែនជាសញ្ញាល្អទេ ដូច្នេះយើងនឹងមិនប្រថុយប្រថានឡើយ»។
សហព័ន្ធបាល់ទាត់បារាំងបានបញ្ជាក់ថា Mbappe មានរបួសសរសៃពួរជង្គង់ ហើយនឹងធ្វើដំណើរត្រឡប់ទៅទីក្រុង Madrid វិញ។
ក្រុមជម្រើសជាតិបារាំងបានយកឈ្នះតួកគីក្នុងលទ្ធផល ១-០ ក្នុងការប្រកួតបើកឆាកពូល A1៕
