ក្រុមហ៊ុនបច្ចេកវិទ្យាហ្វាំងឡង់ Nokia បានប្រកាសកាលពីថ្ងៃអង្គារថា ខ្លួនបានឈានដល់កិច្ចព្រមព្រៀងលក់អាជីវកម្ម Enterprise Campus Edge (ECE) ទៅឱ្យក្រុមហ៊ុនវិនិយោគឯកជន Aurelius ខណៈក្រុមហ៊ុនកំពុងបន្តរៀបចំរចនាសម្ព័ន្ធអាជីវកម្ម ដើម្បីផ្តោតលើវិស័យដែលមានសក្តានុពលបង្កើតតម្លៃរយៈពេលវែង។

 

យោងតាមសេចក្តីថ្លែងការណ៍របស់ Nokia ប្រតិបត្តិការនេះត្រូវបានរំពឹងថានឹងបញ្ចប់នៅឆមាសទី១ ឆ្នាំ២០២៧។ ទោះជាយ៉ាងណា ក្រុមហ៊ុនមិនបានបង្ហាញតម្លៃនៃកិច្ចព្រមព្រៀងនេះទេ។

 

Nokia បានបញ្ជាក់ថា ការលក់អាជីវកម្មនេះគឺជាផ្នែកមួយនៃយុទ្ធសាស្ត្រក្នុងការរៀបចំផលប័ត្រអាជីវកម្មឱ្យកាន់តែមានប្រសិទ្ធភាព និងបែងចែកដើមទុន ព្រមទាំងធនធានទៅកាន់វិស័យដែលអាចបង្កើតតម្លៃរយៈពេលវែងបានខ្ពស់បំផុត។

 

អាជីវកម្ម Enterprise Campus Edge ផ្តល់សេវាបណ្តាញឥតខ្សែឯកជនដល់អតិថិជនជិត ៩០០ផ្សេងគ្នា នៅទូទាំងពិភពលោក ដែលប្រតិបត្តិការក្នុងវិស័យសំខាន់ៗ រួមមាន ផលិតកម្ម រ៉ែ ភស្តុភារ អាកាសយានដ្ឋាន កំពង់ផែ និងការផលិតថាមពល។

 

Nokia បានបន្ថែមថា ក្រោយការផ្ទេរទៅកាន់ម្ចាស់ថ្មី អាជីវកម្ម ECE ត្រូវបានរំពឹងថានឹងទទួលបានឯករាជ្យភាពកាន់តែច្រើន និងអាចផ្តោតលើការអភិវឌ្ឍយុទ្ធសាស្ត្ររបស់ខ្លួនបានកាន់តែច្បាស់លាស់។

 

ការលក់នេះបង្ហាញពីការបន្តកែសម្រួលរចនាសម្ព័ន្ធអាជីវកម្មរបស់ Nokia ដោយផ្តោតធនធានទៅលើវិស័យដែលក្រុមហ៊ុនមើលឃើញថាមានសក្តានុពលបង្កើតកំណើន និងតម្លៃប្រកបដោយចីរភាពក្នុងរយៈពេលវែង៕