កីឡាករ Vinicius Jr នឹងខកខានការប្រកួត El Clasico លើកដំបូងរបស់ Real Madrid ក្នុងរដូវកាលនេះ ទល់នឹង Barcelona បន្ទាប់ពីគណៈកម្មការវិន័យរបស់សហព័ន្ធបាល់ទាត់អេស្ប៉ាញ បានសម្រេចពិន័យព្យួររូបគេរយៈពេល ៤ ប្រកួត កាលពីថ្ងៃពុធ។

 

ខ្សែប្រយុទ្ធក្រុមជម្រើសជាតិប្រេស៊ីលរូបនេះ ត្រូវបានបណ្តេញចេញពីទីលាន បន្ទាប់ពីទាញសក់របស់ Nathan Saliba ក្រោយប្តូរចូលលេងពីកៅអីបម្រុង ក្នុងការប្រកួតដែល Real Madrid យកឈ្នះ Villarreal ក្នុងលទ្ធផល ១-០ កាលពីថ្ងៃសៅរ៍។

 

យោងតាមរបាយការណ៍វិន័យសម្រាប់ការប្រកួតជុំទី៨ នៃក្របខណ្ឌ LaLiga គណៈកម្មការបានដាក់ពិន័យព្យួររយៈពេល ២ ប្រកួតចំពោះការបង្កកំហុសដែលនាំឱ្យទទួលកាតក្រហម ហើយបន្ថែមពិន័យ ២ ប្រកួតទៀត ដោយសារការតវ៉ារបស់កីឡាកររូបនេះទៅកាន់អាជ្ញាកណ្តាល។

 

ការពិន័យនេះមានន័យថា Vinicius នឹងខកខានការប្រកួតលីគទល់នឹង Sevilla, Barcelona, Racing Santander និង Valencia។ ដូច្នេះ គ្រូបង្វឹក Jose Mourinho នឹងមិនអាចប្រើប្រាស់ខ្សែប្រយុទ្ធម្នាក់ដែលលោកតែងតែដាក់ឱ្យលេងជាញឹកញាប់បំផុត ក្នុងការធ្វើដំណើរទៅកាន់កីឡដ្ឋាន Camp Nou នោះទេ។

 

Vinicius បានចាប់ផ្តើមលេងក្នុងជម្រើស ១១ នាក់ដំបូងស្ទើរតែគ្រប់ការប្រកួតរបស់ Real Madrid ក្នុងរដូវកាលនេះ ដោយខកខានតែមួយប្រកួតប៉ុណ្ណោះ។

 

ក្រោយកើតហេតុការណ៍នេះ កីឡាកររូបនេះបានបង្ហោះសារលើបណ្តាញសង្គម ដើម្បីសុំទោសមិត្តរួមក្រុម និងអ្នកគាំទ្រ Real Madrid។

 

ការប្រកួត El Clasico នឹងធ្វើឡើងនៅថ្ងៃទី២៥ ខែតុលា ដោយ Real Madrid ត្រូវធ្វើដំណើរទៅជួប Barcelona ដែលកំពុងឈរនៅកំពូលតារាង LaLiga។ បច្ចុប្បន្ន ក្រុមទាំងពីរមានគម្លាត ៦ ពិន្ទុពីគ្នាក្នុងតារាងចំណាត់ថ្នាក់៕