ក្លិប Burnley បានសម្រេចបញ្ចប់តួនាទីរបស់គ្រូបង្វឹក Nicky Hayen បន្ទាប់ពីដឹកនាំក្រុមបានត្រឹមតែ ១៤ ប្រកួតប៉ុណ្ណោះ។ ក្លិបដែលកំពុងប្រកួតក្នុងលីគ Championship របស់អង់គ្លេសនេះ បានប្រកាសកាលពីថ្ងៃសៅរ៍ បន្ទាប់ពីក្រុមចាប់ផ្តើមរដូវកាលថ្មីយ៉ាងលំបាក។

 

ការប្រកួតចុងក្រោយរបស់គ្រូបង្វឹកសញ្ជាតិបែលហ្ស៊ិក វ័យ ៤៦ ឆ្នាំរូបនេះ គឺការបរាជ័យក្រោមថ្វីជើង Lincoln City ក្នុងលទ្ធផល ៤-១ កាលពីថ្ងៃសៅរ៍។ លទ្ធផលនេះបានធ្វើឱ្យស្ថានការណ៍របស់ Burnley កាន់តែអាក្រក់ ហើយក្រុមបានធ្លាក់ទៅឈរលេខ២២ ក្នុងតារាង។ Burnley ទទួលបានជ័យជម្នះត្រឹមតែមួយលើកប៉ុណ្ណោះ ក្នុងការប្រកួតលីគ ១២ លើកចុងក្រោយ។

 

ក្លិបបានប្រកាសក្នុងសេចក្តីថ្លែងការណ៍ថា៖ «ក្លិបបាល់ទាត់ Burnley បានសម្រេចបណ្តេញគ្រូបង្វឹក Nicky Hayen ចេញពីតំណែងដោយមានប្រសិទ្ធភាពភ្លាមៗ។ ក្រុមប្រឹក្សាភិបាលបានសម្រេចចិត្តបែបនេះ បន្ទាប់ពីការចាប់ផ្តើមរដូវកាល Championship ដែលធ្វើឱ្យមានការខកចិត្ត»។

 

Hayen ត្រូវបានតែងតាំងជាគ្រូបង្វឹក Burnley កាលពីរដូវក្តៅ ដោយចុះកិច្ចសន្យារយៈពេល ៣ ឆ្នាំ ជំនួសលោក Scott Parker ដែលបានចាកចេញពីតំណែងដោយមានការព្រមព្រៀងពីភាគីទាំងពីរកាលពីខែមេសា បន្ទាប់ពីការធ្លាក់ចេញពី Premier League របស់ Burnley ត្រូវបានបញ្ជាក់ជាផ្លូវការ។ នេះជាលើកទីបីក្នុងរយៈពេល ៥ រដូវកាល ដែលក្លិបត្រូវធ្លាក់ទៅលេងក្នុងលីគ Championship។

 

Hayen ធ្លាប់ត្រូវបានតែងតាំងជាគ្រូបង្វឹកបណ្តោះអាសន្នរបស់ក្លិប Club Brugge កាលពីខែមីនា ឆ្នាំ២០២៤។ លោកបានដឹកនាំក្រុមឱ្យឈ្នះជើងឯក Belgian Pro League រដូវកាល ២០២៣-២០២៤ ហើយបាននាំក្រុមឡើងដល់វគ្គ ១៦ ក្រុមចុងក្រោយនៃ Champions League នៅរដូវកាលបន្ទាប់។

 

ក្រោយត្រូវបានតែងតាំងជាគ្រូបង្វឹកពេញសិទ្ធិកាលពីខែមិថុនា ឆ្នាំ២០២៤ លោកក៏បានដឹកនាំ Club Brugge ឈ្នះពាន Belgian Cup និង Belgian Super Cup ផងដែរ។ ជាមួយនឹងសមិទ្ធផលទាំងនេះ លោកត្រូវបានជ្រើសរើសជាគ្រូបង្វឹកឆ្នើមប្រចាំឆ្នាំរបស់ប្រទេសបែលហ្ស៊ិក ក្នុងឆ្នាំ២០២៤៕