លោក Gianni Infantino ប្រធានសហ ព័ន្ធបាល់ទាត់ពិភពលោក (FIFA)បានស្នើ ឲ្យមានក្រុមរហូតដល់ទៅ៤៨ក្រុមប្រកួតWorld Cup ក្នុងជុំចុងក្រោយដោយចំនួននេះលើសពីចំនួនក្រុមដែលគាត់ធ្លាប់សន្យាមុនពេលបោះឆ្នោតជ្រើសរើសប្រធានFIFA ទៅទៀត ។

ការសន្យាមួយរបស់លោក Gianni Infantino ពេលក្លាយទៅជាប្រធាន FIFA គឺគាត់នឹងបង្កើនចំនួនក្រុមជម្រើសជាតិរហូតដល់ទៅ៤០ប្រទេសដើម្បីចូលរួមប្រកួត World Cup ខណៈដែលបច្ចុប្បន្នមានតែ ៣២ក្រុមប៉ុណ្ណោះដែលលេងក្នុងវគ្គជម្រុះតាមពូលជុំចុងក្រោយនៃ World Cup ។

ពេលនេះលោក Infantino ដែលមាន សញ្ជាតិអុីតាលីបានស្នើឲ្យមានរហូតដល់ទៅ៤៨ប្រទេសមកលេងជុំចុងក្រោយ ប៉ុន្តែ១៦ប្រទេសត្រូវកាត់ចេញដោយការប្រកួត Play-Off ។ នៅសល់៣២ក្រុមត្រូវ លេងក្នុងវគ្គជម្រុះតាមពូលដដែលហើយ បន្តលេងក្នុងជុំចាញ់ធ្លាក់ទៀត ។

ប្រធាន FIFA វ័យ៤៦ឆ្នាំរូបនេះបាន ថ្លែងថា “ក្រុមប្រឹក្សាសហព័ន្ធបាល់ទាត់ ពិភពលោកនឹងសម្រេចចិត្តនៅខែមករាខាង មុខ។ យើងក៏នឹងពិភាក្សាគ្នានៅក្នុងខែនេះហើយនឹងសម្រេចចិត្តនៅមុនឆ្នាំ២០១៧”៕

ដោយ៖ ដេវីត