កីឡាករ Lamine Yamal និង Raphinha បានស៊ុតបញ្ចូលទីម្នាក់ ២ គ្រាប់ ខណៈក្រុម Barcelona បានវិលត្រឡប់មករកជ័យជម្នះវិញ ក្រោយបរាជ័យក្នុងជំនួប El Clasico ដោយបានបំបាក់ក្រុម Alaves យ៉ាងចាស់ដៃក្នុងលទ្ធផល ៦-១ និងឡើងទៅឈរកំពូលតារាង La Liga ជាថ្មី។
កាលពីចុងសប្តាហ៍មុន គ្រាប់បាល់ ២ គ្រាប់របស់ Kylian Mbappe បានជួយឱ្យ Real Madrid បញ្ចប់កំណត់ត្រាឈ្នះ ៩ ប្រកួតជាប់គ្នារបស់ Barcelona នៅកីឡដ្ឋាន Camp Nou។
ប៉ុន្តែការស៊ុតបញ្ចូលទីម្នាក់ ២ គ្រាប់របស់ Raphinha និង Lamine Yamal រួមជាមួយគ្រាប់បាល់របស់ Anthony Gordon និង Fermin Lopez បានជួយឱ្យក្រុមអ្នកមានបុណ្យវិលត្រឡប់មករកទម្រង់លេងល្អវិញ។
ជ័យជម្នះនេះបានជួយឱ្យ Barcelona ឡើងទៅលើក្រុម Atletico Madrid ដែលបានឡើងទៅឈរកំពូលតារាងជាបណ្តោះអាសន្ន ក្រោយយកឈ្នះ Levante ក្នុងលទ្ធផល ២-០ កាលពីថ្ងៃសៅរ៍។
Raphinha បានបើកការនាំមុខឱ្យ Barcelona នៅនាទីទី ៨ ដោយស៊ុតបញ្ចូលទីពីការបញ្ជូនបាល់យ៉ាងលឿនរបស់ Lopez។ បន្ទាប់មក Lopez បានប្រែក្លាយពីអ្នកបញ្ជូនបាល់ទៅជាអ្នកស៊ុតបញ្ចូលទី ដោយបាញ់បាល់យ៉ាងខ្លាំងឆ្លងផុតអ្នកចាំទី Alaves គឺ Antonio Sivera។
អ្នកទាំងពីរបានសហការគ្នាម្តងទៀត ដើម្បីបង្កើតគ្រាប់បាល់ទី ៣ របស់ Barcelona។ មុនចប់តង់ទីមួយ Lamine Yamal បានបន្ថែមគ្រាប់ទី ៤ បន្ទាប់ពីបញ្ចប់ការវាយប្រហារជាក្រុមយ៉ាងល្អឥតខ្ចោះ ដោយការស៊ុតបាល់ Volley ពាក់កណ្តាលជើងយ៉ាងខ្លាំង។
Lamine Yamal ដែលទទួលបានចំណាត់ថ្នាក់លេខ ៣ ក្នុងការប្រជែងពានកីឡាករបាល់ទាត់ឆ្នើមបំផុតលើពិភពលោកប្រចាំឆ្នាំ នៅក្នុងពិធីប្រគល់ពាន Ballon d’Or កាលពីថ្ងៃចន្ទ បានបន្ថែមគ្រាប់ទីពីររបស់ខ្លួន ដោយប្រើបច្ចេកទេសលើកបាល់ផុតដៃអ្នកចាំទី Sivera យ៉ាងប៉ិនប្រសប់។
ការស៊ុតបែបនេះត្រូវបានកីឡាករបម្រុង Anthony Gordon ធ្វើត្រាប់តាម ហើយអាចនិយាយបានថា គ្រាប់បាល់របស់គេកាន់តែល្អថែមទៀត ដោយបានកើតឡើង ១៧ នាទីបន្ទាប់ពីគ្រាប់បាល់របស់ Yamal។
រហូតមកដល់ពេលនេះ Raphinha រកបាន ១៥ គ្រាប់ហើយក្នុងលីគរដូវកាលនេះ ច្រើនជាង Kylian Mbappe ដែលឈរលេខ ២ ចំនួន ៤ គ្រាប់ ខណៈ Lamine Yamal ឈរលេខ ៣ ដោយមាន ១០ គ្រាប់។
ចំណែក Alaves បានស៊ុតបញ្ចូលទីមួយគ្រាប់តាមពីក្រោយនៅចុងការប្រកួត បន្ទាប់ពី Mariano Diaz ឆ្លៀតឱកាសពីការបញ្ជូនបាល់ថយក្រោយមិនបានល្អរបស់ Rodri រួចស៊ុតបាល់បញ្ចូលទីផុតដៃអ្នកចាំទី Joan Garcia។
បច្ចុប្បន្ន Barcelona មាន ២ ពិន្ទុនាំមុខក្រុម Atletico Madrid ខណៈ Real Madrid ដែលត្រូវប្រកួតជាមួយ Racing Santander នៅថ្ងៃអាទិត្យ ស្ថិតនៅពីក្រោយ Barcelona ចំនួន ៤ ពិន្ទុបន្ថែមទៀត៕
