ខេត្តកណ្តាល ៖ មានករណីឡានដឹកសិស្សធ្លាក់ចូលស្រះ ស្ថិតនៅភូមិអន្លុង ឃុំព្រែកតាមាក់ ស្រុកខ្សាច់កណ្តាល ខេត្តកណ្តាល ។ ហេតុការណ៍នេះបានកើតនៅ នាវេលាម៉ោង៦ និង២៨នាទីព្រឹកថ្ងៃទី១០ ខែវិច្ឆិកា ឆ្នាំ២០២៦ ក្នុងនោះមានសិស្សប្រុសស្រីចំនួន ២៦ នាក់ !
បើតាមការបញ្ជាក់របស់លោកឧត្តមសេនីយ៍ទោ ឈឿន សុចិត្ត ស្នងការដ្ឋាននគរបាលខេត្តកណ្តាល មុននេះបន្តិចបានឱ្យដឹងថា ៖ មានសិស្សបាត់បង់ជីវិតចំនួនសរុប៥នាក់ហើយក្នុងចំណោមសិស្សសរុបក្នុងរថយន្ត២៦នាក់ ខណះអ្នកបើកបរកំពុងត្រូវបានសួរនាំ។
ដោយឡែក បើតាមដកស្រង់សំដីលោក នាយកសាខាព្រែកតាមាក់ នៅព្រឹកថ្ងៃទី១០ ខែវិច្ឆិកា ឆ្នាំ២០២៦ បានឱ្យដឹងថា ៖ ឡាននេះមិនមែនដឹកតែសិស្សទេ មានដឹកធ្យូងអីផ្សេងៗ ជាឡានរកសុី ចឹងមិនមែនជារថយន្តដឹកសិស្សទេ គ្រាន់តែជាមធ្យោបាយរបស់សិស្ស គាត់ជួលឡាននេះដឹកសិស្សមករៀននៅកន្លែងជិតនឹង។ លើកបន្តថា , បើឡានប៊ែលធី យើងមានបិទឡូហ្គោប៊ែលធី ដូច្នេះនេះមិនមែនជារថយន្តសាលាប៊ែលធី នោះឡើយ។ លោកស្នងការនគរបាលខេត្តកណ្តាល បានបញ្ជាក់ថា ឡាននេះដឹកសិស្សសាលាប៊ែលធី បណ្តាលឱ្យស្លាប់ចំនួន៥នាក់ គឺជាយុវតីទាំង៥ ។
ចំពោះព័ត៌មានលម្អិត អង្គភាពយើងខ្ញុំនឹងបន្តផ្សព្វផ្សាយបន្តជូនតាមក្រោយ ៕
ដោយ ៖ សិលា
