ភ្នំពេញ៖ បុរសម្នាក់បើករថយន្តមួយគ្រឿងម៉ាកកាមរីបាឡែនយ៉ាងលឿន មិនបានប្រុងប្រយ័ត្នជ្រុលបុករនាំងដែកពុះចែកទ្រូងផ្លូវ បណ្តាលឲ្យរងការខូចខាតអស់ចំនួន៣ផ្ទាំង ។

ករណីគ្រោះថ្នាក់ចរាចរណ៍នេះកើតឡើងនៅវេលាម៉ោង១២និង៣០នាទីរំលងអធ្រាត្រឈានចូលថ្ងៃទី១០ ខែតុលា ឆ្នាំ២០១៦ នៅចំណុចមុខក្រសួងទេសចរណ៍ចាស់ តាមបណ្តោយផ្លូវព្រះមុន្នីវង្ស ស្ថិតក្នុងសង្កាត់បឹងរាំង ខណ្ឌដូនពេញ ចំណែករថយន្តបែកកង់ខាងមុខផ្នែកខាងឆ្វេងទៅមុខលែងរួច។

សមត្ថកិច្ចបានឲ្យដឹងដែរថា ក្នុងហេតុការណ៍គ្រោះថ្នាក់ខាងលើនេះ គឺបណ្តាលមកពីការបើកបរហួសល្បឿនកំណត់ និងខ្វះការប្រុងប្រយ័ត្ន សំណាងហើយដែលមិនបង្កឲ្យមានអ្នករងរបួស ឬក៏ស្លាប់នោះ ។

ក្រោយពេលកើតហេតុសមត្ថកិច្ចបានចុះមកដល់ចំណុចកើតហេតុ តែមិនបានឃាត់ម្ចាស់រថយន្តនោះទេ និងទំនាក់ទំនងទៅនគរបាលជំនាញរាជធានីមកស្ទូចយកទៅរក្សាទុកនៅការិយាល័យចរាចរណ៍ផ្លូវគោករងចាំដោះស្រាយពេលក្រោយ ៕

ដោយ៖ ព្រែកជ័យ