លោក Gao Hongbo បានលាលែង ចេញពីតំណែងគ្រូបង្វឹកជម្រើសជាតិចិនក្រោយកូនក្រុមរបស់លោកប្រកួតចាញ់ ក្រុមជម្រើសជាតិអូបេគីស្ថានដោយលទ្ធផល ២-០ នៃកម្មវិធីជម្រុះ World Cup ក្នុងទ្វីបអាស៊ី ។

លោក Gao Hongboបាននិយាយប្រាប់អ្នកសារព័ត៌មានថា”ខ្ញុំបានពិភាក្សាជាមួយនឹងប្រធានសហព័ន្ធបាល់ទាត់ចិនហើយ មុនពេលប្រកួតនេះ។ ពួកយើងបានយល់ព្រមថាប្រសិនបើពុំទទួលបានលទ្ធផលល្អពីការប្រកួតជាមួយនឹងអូបេគីស្ថាននេះទេខ្ញុំនឹងចាកចេញពីតំណែង ។ ពេលនេះ យើងឃើញលទ្ធផលហើយ គឺដល់ពេលដែលខ្ញុំត្រូវឈប់ដឹកនាំក្រុមជម្រើសជាតិចិនទៀតហើយ។”

លោក Gao បានថ្លែងបន្តទៀតថា “ខ្ញុំសូមអរគុណដល់អ្នកគាំទ្របាល់ទាត់និងសារព័ត៌មានដែលបានជួយគាំទ្រពួកយើងក្នុងការប្រកួត។ ខ្ញុំសង្ឃឹមថាជម្រើសជាតិចិននឹងលេងបានល្អនៅថ្ងៃអនាគតហើយយើងនឹងជួបគ្នាទៀតនៅក្នុងពិភពបាល់ ទាត់”។

ក្តីសង្ឃឹមរបស់ចិនថានឹងបានទៅលេងនៅប្រទេសរុស្ស៊ីឆ្នាំ២០១៨នៃកម្មវិធី World Cup ហាក់ដូចជានៅឆ្ងាយ ដោយពួក គេតាមពីក្រោយក្រុមដែលមានកៅអីជាប់ស្វ័យប្រវត្តិចំនួន៨ពិន្ទុ។ ក្រុមជម្រើសជាតិអូបេគីស្ថានឈរលំដាប់លេខ២ក្រោយទទួលជ័យជម្នះតាមពីក្រោយក្រុមកំពូលតារាង អុីរ៉ង់តែមួយពិន្ទុប៉ុណ្ណោះ៕

ដោយ៖ ដេវីត