ភ្នំពេញ៖ កម្លាំងសមត្ថកិច្ចនគរបាលប៉ុស្តិ៍ផ្សារដើមថ្កូវសហការជាមួយប្រជាការពារខណ្ឌ ធ្វើការឃាត់ខ្លួនជនសង្ស័យ២នាក់និងថ្នាំញៀន៥កញ្ចប់តូច កាលពីវេលាម៉ោង៦ និង២០នាទីល្ងាច ថ្ងៃទី១២ ខែតុលា ឆ្នាំ២០១៦ ដែលស្ថិតនៅតាមផ្លូវបេតុងចណុចបឹងត្របែក ស្ថិតក្នុងសង្កាត់ផ្សារដើមថ្កូវខណ្ឌចំការមន។

ជនសង្ស័យទី១មានឈ្មោះចំរុង ហៅខ្លា ភេទប្រុស អាយុ៣៥ឆ្នាំ មានមុខរបកម្មករសំណង់ ស្នាក់នៅភូមិតាង៉ូ សង្កាត់និរោតន៍ ខណ្ឌច្បារអំពៅ និងទី២មានឈ្មោះជឹមសុជាតិ ភេទប្រុស អាយុ៣៥ឆ្នាំមុនរបររើសអេតចាយ ស្នាក់នៅមិនពិតប្រាកដ មានស្រុកកំណើតនៅភូមិព្រែកលាវ ឃុំរកាកោង ស្រុកមុខកំពូល ខេត្តកណ្ដាល។

តាមប្រភពពីសមត្ថកិច្ចបានឲ្យដឹងថាមុខពេលកើតហេតុកម្លាំងនគរបាលប៉ុស្តិ៍ផ្សារដើមថ្កូវសហការជាមួយកម្លាំងប្រជាការពារកំពុងតែល្បាតក្នុងភូមិសាស្ត្ររបស់ខ្លួនក៏ប្រទះឃើញជនសង្ស័យម្នាក់ឈ្មោះចំរុង ហៅខ្លា កំពុងឈរតែម្នាក់ឯងដោយមានសង្ស័យ រួចក៏បានឃាត់ឲ្យឈប់និងឆែកឆេររកឃើញថ្នាំញៀន២កញ្ចប់តូច ខណៈពេលនោះសមត្ថកិច្ចបានសួរនាំទៅគឺទិញពីឈ្មោះជឹមសុជាតិ ក្នុងតំលៃ៣០០០០រៀល ដើម្បីយកទៅលក់បន្តទៀត តែមិនទាន់ទាំងបានយកទៅលក់ផងក៏ត្រូវសមត្ថកិច្ចឃាត់ខ្លួនតែម្ដង។ បន្ទាប់ពីសួរនាំជនសង្ស័យខាងលើរួចមក កម្លាំងសមត្ថកិច្ចក៏បានឈានទៅឃាត់ខ្លួនជឹម សុជាតិ នៅវេលាម៉ោង៩និង១០នាទីនៅចំណុចក្រុមហ៊ុនជូបីរកឃើញថ្នាំ៣កញ្ចប់ទៀត។

បច្ចប្បន្នជនសង្ស័យទាំង២នាក់និងថ្នាំ៥កញ្ចប់បាននាំខ្លួនមកសាកសួរនៅប៉ុស្តិ៍ផ្សារដើមថ្កូវនិងបញ្ជូនបន្តទៅអធិការដ្ឋាននគរបាលខណ្ឌចំការមនចាត់ការតាមផ្លូវច្បាប់៕

ដោយ៖ ជីម ភារ៉ា ដង្កោ