ខេត្ដសៀមរាប៖ នៅទីបំផុតកូនប្រសាប្រធានពន្ធនាគារខេត្តសៀមរាប ដែលបានវាយប៉ូលិសស្រីបណ្ដាលឲ្យរងរបួសកាលពីថ្ងៃទី៤ ខែសីហា ឆ្នាំ២០១៥នេះ ត្រូវបានកម្លាំងនគរបាលកម្រិតស្រាលកោះហៅមកសួរនាំនៅការិយាល័យនា ព្រឹក៧ ខែសីហា ឆ្នាំ២០១៥នេះ ។
លឹម ស្នេហ៍គំនិត ជនសង្ស័យដែលប្រើហឹង្សាមកលើនារីមន្រ្តីនគរបាលចរាចរណ៍ បានចូលមកបំភ្លឺ
សេចក្ដីរាយការណ៍បានឲ្យដឹងថា គិតមកដល់ម៉ោង១១និង៤០នាទីព្រឹកថ្ងៃដដែលនេះ កូនប្រសាលោកឧត្ដមសេនីយ៍ទោឆែម សាវុធ ប្រធានពន្ធនាគារខេត្តសៀមរាប ឈ្មោះលឹម ស្នេហ៍គំនិត ប្រុសអាយុប្រហែលជាង៣០ឆ្នាំ កំពុងឆ្លើយបំភ្លឺនៅការិយាល័យព្រហ្មទណ្ឌកម្រិតស្រាលខេត្តសៀមរាប នៅឡើយ ។
ប្រភពពីសមត្ថកិច្ចបានទម្លាយថា នៅក្នុងការចូលបំភ្លឺនោះ ឈ្មោះលឹម ស្នេហ៍គំនិត បានមកជាមួយនឹងមេធាវីម្នាក់ផងដែរ។ ប៉ុន្តែករណីនេះទំនងជាមិនអាចសម្របសម្រួលបញ្ចប់រឿងត្រឹមនេះបាន ឡើយ គឺត្រូវបញ្ជូនជននោះតុលាការមិនខាន។
គួរបញ្ជាក់ថា មន្ត្រីនគរបាលចរាចរណ៍ដែលស្ថិតក្នុងហេតុការណ៍ បាននិយាយថា នៅមុនកើតហេតុ គេបានឃើញឈ្មោះលឹម ស្នេហ៍គំនិត ជិះម៉ូតូឌុបស្រីម្នាក់ពីក្រោយ។ លុះមកដល់រង្វង់មូល ត្រង់មណ្ឌលគាំពារមាតានិងទារក ជននោះត្រូវបាននគរបាលចរាចរណ៍មួយក្រុម ដែលបានឈរនៅបីគោលដៅតូចៗ ឃាត់ឲ្យឈប់ ដោយសារតែជនសង្ស័យនោះ បើកបរម៉ូតូ ដោយអត់ពាក់មួកសុវត្ថិភាព និងម៉ូតូក៏អត់ស្លាកលេខ។
ក្នុងខណៈនោះ ជនសង្ស័យ បានព្យាយាមបើកម៉ូតូទៅមុខ ទៅក្រោយបម្រុងគេចពីប៉ូលិស ប៉ុន្តែមិនអាចគេចបាន ព្រោះនៅកែងផ្លូវទាំងនោះ មាននគរបាលចរាចរណ៍ប្រចាំការទាំងអស់ ទើបចុងក្រោយ អ្នកបើកម៉ូតូ សម្រេចបើកតម្រង់គោលដៅនគរបាលស្ត្រីដែលឈរជើង។ នគរបាលស្ត្រី បានអនុវត្តច្បាប់ ហៅឲ្យឈប់ម៉ូតូ។ ជនសង្ស័យនោះ ក៏បានឈប់ហើយបុរសអ្នកបើកម៉ូតូ បានវាយទៅលើនគរបាលស្រីម្នាក់ឈ្មោះទូច មុំ ៣ទៅ៤ដៃ។
បន្ទាប់ពីវាយលើសមត្ថកិច្ចហើយ ជនសង្ស័យនោះ បានបើកម៉ូតូចេញទៅ តែត្រូវស្ត្រីនគរបាលរងគ្រោះ បានរត់តាមពីក្រោយ ដោយតោងម៉ូតូជនល្មើសនោះជាប់ ហើយបុរសជាម្ចាស់ម៉ូតូគេចខ្លួនបាត់។ នៅប៉ុន្មាននាទីក្រោយ ជនបង្កបានបើកឡានម៉ាក ហាយហ្វ្រីត មកគំរាមបំបុកសម្លាប់ប៉ូលិសនោះទៀត ប្រសិនបើជនរងគ្រោះមិនសុំទោសរូបគេ ៕
រូបជនសង្ស័យ និងសមត្ថកិច្ចនារីរងគ្រោះ(រូបភាពគេហទំព័រអគ្គស្នងការនគរបាលជាតិ)
ដោយ៖ ជានិរន្តន៍
