ភ្នំពេញ៖ បុរសម្នាក់ស្រវឹងស្រាឡើងជោកជាំបើករថយន្តសេរីទំនើបលឿនដូចហោះដល់ផ្លូវកែងបួងចង្កូតមិនទាន់ក៏ជ្រុលទៅបុកបង្គលភ្លើងដែកពេញទំហឹងបណ្ដាលឲ្យខូចខាតរថយន្តបង្កផ្នែកខាងមុខយ៉ាងដំណំ  សំណាងល្អមិនគ្រោះថ្នាក់ដល់ជីវិត កាលពីវេលាម៉ោង១១ និង៣៥នាទីយប់ថ្ងៃទី២០ ខែតុលា ឆ្នាំ២០១៦ តាមបណ្ដោយផ្លូវលេខ៦៣ កែងនិងផ្លូវលេខ៤៦៦ ត្រង់ចំណុចមុខសាលាភូមិមិន្ទរដ្ឋបាលស្ថិតក្នុុងសង្កាត់ទន្លេបាសាក់ ខណ្ឌចំការមន រាជធានីភ្នំពេញ។

យោងតាមប្រភពព័ត៌មាននៅកន្លែងកើតហេតុបានឲ្យដឹងថា មុនពេលកើតហេតុគេឃើញរថយន្តម៉ាកLAND CRUISER ពណ៌ស្ករ ពាក់ស្លាកលេខភ្នំពេញ2M-6506 បើកបរដោយបុរសម្នាក់ក្នុងស្ថានភាពស្រវឹងស្រាជោកទិសដៅពីជើងទៅត្បូងក្នុងល្បឿនលឿនដូចហោះ លុះមកដល់ចំណុចកើតហេតុផ្លូវកែងបួងចង្កូតមិនទាន់ជ្រុលទៅបុកបង្គោលភ្លើងដែកពេញទំហឹងលាន់សូដូចរន្ទះបណ្ដាលឲ្យរថយន្តខូចខាតផ្នែកខាងមុខយ៉ាងដំណំនិងផ្ទុះពោង តែមិនបង្កគ្រោះថ្នាក់ដល់អាយុជីវិត។ ភ្លាមៗនោះគេឃើញអ្នកបើកបររថយន្តបានបើកទ្វារចេញហើយមានម៉ូតូ១គ្រឿងជិះមកឌុបយកទៅបាត់ដោយបន្សល់ទុករថយន្តនៅនិងកន្លែងកើតហេតុ។

ក្រោយកើតហេតុសមត្ថកិច្ចមូលដ្ឋានបានមកដល់ហើយទំនាក់ទំនងទៅសមត្ថកិច្ចជំនាញមកធ្វើការវាស់វែងយករថយន្តបង្កទៅរក្សាទុកនៅការិយាល័យចរាចរណ៌រាជធានីភ្នំពេញរងចាំម្ចាស់ចូលខ្លួនមកដោះស្រាយតាមនីតិវិធីច្បាប់នៅពេលក្រោយ៕

ដោយ៖ ជីម ភារ៉ា ដង្កោ