ភ្នំពេញ៖ មនុស្សប្រុសស្រី១៦នាក់និងថ្នាំញៀន៦កញ្ចប់ត្រូវកម្លាំងសមត្ថកិច្ចខណ្ឌសែនសុខធ្វើការបង្ក្រាបឃាត់ខ្លួននៅមុខមន្ទីរពេទ្យលោកសង្ឃ កាលពីវេលាម៉ោង១១ និង១០នាទីព្រឹកថ្ងៃទី២១ ខែតុលា ឆ្នាំ២០១៦ នៅចំណុចមុខមន្ទីរពេទ្យព្រះកុសុមះ (អតីតពេទ្យលោកសង្ឃ) ភូមិត្រពាំងឈូក សង្កាត់ទឹកថ្លា ខណ្ឌសែនសុខ។
ក្នុងប្រត្តិបត្តការណ៍នេះដឹកនាំដោយលោក គួក សុខហួ អធិការរងខណ្ឌសែនសុខតំណាងលោក ម៉ក់ ហុង អធិការនគរបាលខណ្ឌ និងកម្លាំងសមត្ថកិច្ចក្រោមឱវាទជាច្រើននាក់ទៀត។
លោក គួក សុខហួ អធិការរងដែលដឹកនាំកម្លាំងផ្ទាល់បានឲ្យដឹងថា ដោយមានការបញ្ជាផ្ទាល់ពីលោកវរសេនីយ៍ឯក ម៉ក់ ហុង អធិការនគរបាលខណ្ឌ បានឲ្យដឹកនាំចុះធ្វើរដ្ឋបាលនៅតំបន់នេះឲ្យដូចជាភ្លៀងរលឹម បើទោះបីតំបន់នេះមានការស្មុកស្មាញយ៉ាងណាក៏ដោយជាលទ្ធផលឈានដល់ការឃាត់ខ្លួនបានមនុស្សប្រុស្រីទាំង១៦នាក់ដែលនាំគ្នាទៅជក់គ្រឿងញៀននៅចំណុចខាងលើនេះតែម្តង។
លោកអធិការរងបន្តទៀតថា វត្ថុតាងចាប់យកពីមនុស្ស១៦នាក់ក្នុងនោះស្រី២នាក់ខាងលើរួមមាន៖ ថ្នាំញៀនចំនួន៦ កញ្ចប់ធំ ១កញ្ចប់តូច៥កញ្ចប់ និងឧបករណ៍សម្រាប់ប្រើប្រាស់មួយចំនួន។
បច្ចុប្បន្នជនសង្ស័យទាំង១៦នាក់រួមនិងវត្ថុតាងកំពុងឃាត់ខ្លួននៅអធិការដ្ឋាននគរបាលខណ្ឌសែនសុខដើម្បីចាត់ការតាមនីតិវិធី៕
ដោយ៖ តុង សីហា
