ភ្នំពេញ៖ កម្លាំងអាវុធហត្ថក្រុងភ្នំពេញ និងអាវុធហត្ថខណ្ឌពោធិ៍សែនជ័យបើកប្រតិបត្តិការតាមស្រាវជ្រាវតាមចាប់ឃាតករសុីឈ្នួល និងប្រពន្ធដើមជាអ្នកសមគំនិតគ្នាសម្លាប់ប្តីខ្លួនឯងរហូតដល់ថ្ងៃទី២០ ខែតុលា ឆ្នាំ២០១៦  កាលពីវេលាម៉ោង៧ និង៣០នាទីយប់ ទើបធ្វើការឃាត់ខ្លួនបាននៅចំណុចមុខផ្សារវីងមីញ ផ្លូវលំ ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ ។

ក្រោយពីឃាត់ខ្លួនបានឃាតករនិងអ្នកជួលរួមទាំងស្រ្តីម្នាក់ផ្សេងទៀត យកទៅសាកសួរនៅការិយាល័យជំនាញអាវុធហត្ថក្រុងភ្នំពេញ ហើយរកឃើញ មុខឃាតករពិត និងអ្នកសមគំនិត សរុបមនុស្ស២នាក់ ជាអ្នកសម្លាប់ ជនរងគ្រោះយកទៅទម្លាក់ទឹកប្រឡាយ រហូតដល់វេលាម៉ោង១០ព្រឹកថ្ងៃទី២៣ ខែតុលា ឆ្នាំ២០១៦នេះ ឃាតករត្រូវបានកម្លាំងអាវុធហត្ថក្រុងនិងខណ្ឌពោធិ៍សែនជ័យ នាំខ្លួនឃាតករទៅធ្វើត្រាប់ដល់កន្លែងទម្លាក់លាក់សាកសពនៅប្រឡាយ ភូមិគោកចំបក់ សង្កាត់ចោមចៅ ខណ្ឌពោធិ៍សែនជ័យ ។

ស្រ្តីជាប្រពន្ធដើមរបស់ជនរងគ្រោះហើយជាអ្នកជួលសម្លាប់ប្តីខ្លួនឯងនោះមានឈ្មោះ សៅ សំអឿន អាយុ៤៦ឆ្នាំ ជាប្រពន្ធរបស់ជនរងគ្រោះឈ្មោះកៅ ផា ភេទប្រុស អាយុ៤៨ឆ្នាំ មុខរបរបើកបររថយន្តឈ្នួល មានទីលំនៅភូមិ ត្រពាំងដំរី ឃុំកំពង់អំពិល ស្រុករមាសហែក ខេត្តស្វាយរៀង ។ ចំណែកឃាតករមានឈ្មោះ សូរ ផា ហៅអ៊ួក ភេទប្រុស អាយុ៣០ឆ្នាំ មុខរបរបើកបររថយន្តឈ្នួល ស្នាក់នៅបន្ទប់ជួលលេខ២៣ ភូមិត្រពាំងថ្លឹង សង្កាត់ចោមចៅ ក្បែរកន្លែងកើតហេតុ មានស្រុកកំណើតនៅភូមិ ត្រពាំងដំរី ឃុំកំពង់អំពិល ស្រុករមាសហែក ខេត្តស្វាយរៀង ។

ក្រោយពីឃាត់ខ្លួនឃាតករបាននាំយកសាកសួរនៅការិយាល័យជំនាញរហូតមកដល់ព្រឹកថ្ងៃទី២៣ ខែតុលា ឆ្នាំ២០១៦នេះ នាំខ្លួនឃាតករទៅធ្វើត្រាប់ដល់កន្លែងកើតហេតុុ។ បន្ទាប់ពីនាំយកទៅធ្វើត្រាប់រួចកម្លាំងអាវុធហត្ថក្រុងបាននាំយកទៅកសាងសំណុំរឿងដើម្បីបញ្ជូនទៅតុលាការចាត់ការតាមផ្លូវច្បាប់៕

ដោយ៖ សុខាសែនជ័យ