គ្រូបង្វឹករបស់ក្រុមអ្នកមានបុណ្យ Barcelona លោក Luis Enrique បានប្រកាស ថា ក្រុមរបស់លោកចាំបាច់ត្រូវតែបង្ហាញ ទម្រង់លេងឲ្យបានល្អប្រសើរនៅពេលប៉ះជាមួយក្រុម មេឃខៀវ Manchester City ម្តងទៀតរបស់លោក Pep Guardiola ក្រោយពីបានយកឈ្នះទាំងប្រផុតប្រផើយក្នុង លទ្ធផល ១-០ លើក្រុម Granada កាលពី ថ្ងៃសៅរ៍ក្នុងក្របខ័ណ្ឌអេស្ប៉ាញ La liga ។

សម្រាប់ជំនួបនេះក្រុម Barcelona នឹង ធ្វើដំណើរទៅកាន់ទីក្រុង Manchester នៅ រាត្រីថ្ងៃអង្គារនេះ ក្រោយពីក្រុមបានបំបាក់ក្រុមរបស់លោក Guardiola យ៉ាងចាស់ដៃ ក្នុងលទ្ធផល ៤-០ កាលពីសប្តាហ៍មុនដើម្បីនាំមុខនៅលើតារាងនៃពូល C ក្នុងក្របខ័ណ្ឌ Champions League ។

ទោះបីជាយ៉ាងណាកីឡាករឆ្នើម Messi, Luis Suarez និង Neymar បានបញ្ចប់រាត្រី ថ្ងៃសៅរ៍ ដោយការមិនអាចរកគ្រាប់បាល់ បញ្ចូលទីបាន ខណៈដែលខ្សែបម្រើ Rafinha បានរកគ្រាប់បាល់ឈ្នះតែមួយគ្រាប់នោះនៅពេលប្រកួតជាមួយនឹងក្រុមផ្តោតតែលើតំបន់ការពាររបស់ក្រុម Granada ។

គ្រូបង្វឹកថ្មីរបស់ក្រុម Barcelona លោក Enrique បាននិយាយថា នៅពេលនេះយើង នឹងទៅទីក្រុង Manchester ហើយបើតាម ទ្រីស្តីយើងជាក្រុមមួយដែលស្ថិតក្នុងសម្ពាធដ៏ខ្ពស់ ហើយយើងនឹងស្ទើរតែត្រូវប្រកួតមួយទល់មួយ ។

អ្នកត្រូវតែមានភាពមុតស្រួច និងរឹងមាំដើម្បីជម្នះរាល់សម្ពាធនោះ ។ ប្រសិនបើ អ្នកជម្នះបាន អ្នកនឹងមានឱកាសហើយ ប្រសិនបើមិនអាចទេនោះ គូប្រកួតនឹងឈ្នះការគ្រប់គ្រងបាល់ជាមួយនឹងកីឡាករដ៏ ឆ្នើមជាច្រើន។

បច្ចុប្បន្ន Barcelona កំពុងតែដេញតាម ពីក្រោយក្រុម Real Madrid ចំនួន២ពិន្ទុ នៅលើកំពូលតារាងនៃក្របខ័ណ្ឌអេស្ប៉ាញ La Liga ៕

ដោយ៖ ដេវីត