ភ្នំពេញ៖ គណៈបញ្ជាការឯកភាពខណ្ឌសែនសុខចុះបង្ក្រាបទីតាំងហ្គេមបាញ់ត្រីមួយកន្លែងឃាត់មនុស្ស៣នាក់ក្នុងនោះមានអ្នកលេង២នាក់អ្នកមើលការខុសត្រូវម្នាក់ និងចាប់យកទូហ្គេមបាញ់ត្រី២ទូ។

ការចុះបង្ក្រាបនេះធ្វើឡើងកាលពីវេលាម៉ោង៩និង៣០នាទីយប់ថ្ងៃទី១៦ ខែវិច្ឆិកា ឆ្នាំ២០១៦ នៅចំណុចផ្លូវ៥៩៨ ម្ដុំត្រឡោកបែក ភូមិទំនប់ សង្កាត់ភ្នំពេញថ្មី ខណ្ឌសែនសុខ។

ប្រតិបត្តិការនេះដឹកនាំដោយលោក សាំង សុភក្ដ្រវិចិត្រ អភិបាលរងខណ្ឌ តំណាង លោក ប៉ឹល កុសល អភិបាលខណ្ឌសែនសុខ បានសហការជាមួយកម្លាំងសមត្ថកិច្ចខណ្ឌខណ្ឌសែនសុខបានចុះបង្ក្រាបទីតាំងហ្គេមបាញ់ត្រីមួយកន្លែងដែលធ្វើការរឹបអូសបានទូបាញ់ត្រីចំនួន២ទូ និងដកហូតម៉ូតូ៤គ្រឿង ឃាត់បានមនុស្ស៣នាក់ក្នុងនោះ២នាក់ជាអ្នកលេង និងម្នាក់ទៀតជាអ្នកមើលការខុសត្រូវ។

អ្នក់ទាំង៣ដែលឃាត់ខ្លួនឈ្មោះ ម៉ម មករា ភេទប្រុស អាយុ២៧ឆ្នាំ មុខរបរសន្តិសុខក្លឹបស្នាក់នៅភូមិទំនប់ សង្កាត់ភ្នំពេញថ្មី ខណ្ឌសែនសុខ (ជាអ្នកលេង) ទី២មានឈ្មោះ សំ ពិសិទ្ធិ ភេទប្រុស អាយុ២៥ឆ្នាំ មុខរបរនៅផ្ទះ ស្នាក់នៅភូមិទំបន់ សង្កាត់ភ្នំពេញថ្មី ខណ្ឌសែនសុខ (ជាអ្នកលេង) និងទី៣មានឈ្មោះ ឌី ស្រីនាង ភេទស្រី អាយុ១៩ឆ្នាំ មុខរបរអ្នកមើលការខុសត្រូវដាក់ពុងត្រី។

បច្ចុប្បន្នមនុស្សប្រុសស្រីទាំង៣នាក់កំពុងឃាត់ខ្លួននៅអធិការដ្ឋាននគរបាលខណ្ឌសែនសុខចាត់ការបន្តតាមនីតិវិធី ចំណែកវត្ថុតាងបានយកទៅរក្សាទុកនៅសាលាខណ្ឌដើម្បីកម្ទេចចោល៕

ដោយ៖ តុង សីហា