ខេត្តព្រះសីហនុ៖លោក សេង ណុង ប្រធានមន្ទីរពេទ្យបង្អែកខេត្តព្រះសីហនុបានឲ្យដឹងថា ក្រោមកិច្ចសហការរវាងមន្ទីរពេទ្យបង្អែកខេត្តព្រះសីហនុ ជាមួយក្រុមវេជ្ជសាស្រ្តសម្តេចតេជោ និងក្រុមគ្រូពេទ្យមកពីប្រទេសម៉ាឡេសុីបានចាប់ផ្តើមសកម្មភាពការងារពិនិត្យ ព្យាបាល និងវះកាត់ជំងឺភ្នែកឡើងបាយ ភ្នែកកន្ទុយថ្លែន ជំងឺទូទៅ មាត់ ធ្មេញ រោគស្ត្រី អេកូសាស្ត្រ និងកាត់វែនតាជូនប្រជាពលរដ្ឋនៅក្នុងខេត្តព្រះសីហនុ នៅក្នុងមន្ទីរ ពេទ្យបង្អែកខេត្តព្រះសីហនុ ចាប់ថ្ងៃទី១៧ ដល់ថ្ងៃទី២០ ខែធ្នូ ឆ្នាំ២០១៦ រយះពេល៥ថ្ងៃ ដោយឥតគិតថ្លៃ ជាពិ សេសថ្ងៃទី២០ ខែធ្នូ ឆ្នាំ២០១៦ខាងមុខ មានកម្មវិធីពិនិត្យព្យាបាលគ្រប់ជំនាញ គ្រប់ផ្នែកជូនប្រជាពលរដ្ឋ ។
លោក សេង ណុង បន្តថា ក្រុមគ្រូពេទ្យវេជ្ជសាស្ត្រសម្តេចតេជោហ៊ុនសែន មានចំនួន ៤៩នាក់ ក្នុងនោះមានក្រុមគ្រូ ពេទ្យវេជ្ជសាស្ត្រុមកពីប្រទេសម៉ាឡេស៊ី ២៥នាក់ ក្រុមវេជ្ជ សាស្ត្រសម្តេចតេជោ ១៤នាក់ និងក្រុមវេជ្ជសាស្ត្រយុវជន ១០នាក់ ជួយពិនិត្យ ព្យាបាលចាប់ពីថ្ងៃទី១៧ ដល់ថ្ងៃទី២០ ខែធ្នូ ឆ្នាំ២០១៦ មានពិនិត្យ ព្យាបាល វះកាត់ភ្នែកឡើងបាយ ភ្នែកកន្ទុយថ្លែន ហើយនៅថ្ងៃទី២០ មានការពិនិត្យព្យាបាលជាលក្ខណទ្រង់ទ្រាយធំ មានដូចជា ពិនិត្យព្យាបាលជំងឺទូទៅប្រជាពលរដ្ឋ៨០០នាក់ ជំងឺមាត់ ធ្មេញ ១០០នាក់ រោគស្ត្រី ៨០នាក់ ពិនិត្យដោយអេកូសាស្ត្រ ១០០នាក់ និងពិនិត្យកាត់វែនតាជូនប្រជាពលរដ្ឋ ៣០០នាក់ ៕
