ភ្នំពេញ៖ នារីម្នាក់ត្រូវបានកម្លាំងនគរបាលខណ្ឌពោធិ៍សែនជ័យសហការជាមួយកម្លាំងនគរបាលប៉ុស្តិ៍ចោមចៅធ្វើការឃាត់ខ្លួនដកហូតថ្នាំញៀន១កញ្ចប់ធំ កាលពីវេលាម៉ោង២និង៣០នាទីរសៀលថ្ងៃទី១៩ ខែធ្នូ ឆ្នាំ២០១៦ នៅផ្ទះសំណាក់មួយកន្លែងយីហោសីុម ហួ តាមបណ្តាលផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។

ជនសង្ស័យឈ្មោះពេជ្យ អាណាត់ ភេទស្រី អាយុ២៧ឆ្នាំ ស្នាក់បន្ទប់ជួលភូមិជ្រៃកោង សង្កាត់ចោមចៅ ខណ្ឌពោធិ៍សែនជ័យ មានស្រុកកំណើតនៅភូមិត្រពាំងរាំ ឃុំអភិវត្ត ស្រុកទឹកផុស ខេត្តកំពង់ឆ្នាំង។

សមត្ថកិច្ចបានឲ្យដឹងថា ដោយមានការរាយការណ៍ពីប្រជាពលរដ្ឋនៅក្បែរបានប្រាប់ថា ផ្ទះសំណាក់ខាងលើមានជនសង្ស័យតែងតែមកយកទីតាំងនោះសម្ងំប្រើប្រាស់និងជួញដូរគ្រឿងញៀនដោយសង្ស័យម្ចាស់ទីតាំងបើកដៃ ទើបសមត្ថកិច្ចបើកកិច្ចសហការនិងធ្វើការស្រាវជ្រាវអស់រយៈពេលជាយូរហូតដល់វេលាកើតហេតុខាងលើទើបកម្លាំងចុះធ្វើការឆែកឆេរនៅផ្ទះសំណាក់ខាងលើជាន់ទី២រកឃើញថ្នាំញៀន១កញ្ចប់ធំ និងធ្វើការឃាត់ខ្លួនតែម្តង។

ក្រោយពេលឃាត់ខ្លួនជនសង្ស័យត្រូវបានកម្លាំងនគរបាលយកទៅអធិការនគរខណ្ឌពោធិ៍សែនជ័យកសាងសំណុំរឿងបញ្ជូនទៅតុលាការចាត់កាតាមផ្លូវច្បាប់៕

ដោយ៖ សុខាសែនជ័យ