ភ្នំពេញ៖ រថយន្តឡង់គ្រីស័រមួយគ្រឿងឡើងស៊េរីឡិចស៊ីស៤៧០ បើកឆ្លងផ្លូវមិនប្រយ័ត្នត្រូវរថយន្តកាមរីបាឡែនមួយគ្រឿងទឿតបើកបុកពេញទំហឹងបណ្ដាលឲ្យរងការខូចខាតទាំងសងខាងយ៉ាងដំណំ កាលពីវេលាម៉ោង១រំលងអធ្រាត្រថ្ងៃទី២០ ខែធ្នូ ឆ្នាំ២០១៦ នៅមុខផ្សារត្រពាំងថ្លឹង ផ្លូវវេងស្រេង ភូមិត្រពាំងថ្លឹង សង្កាត់ចោមចៅ ខណ្ឌពោធិ៍សែនជ័យ។

តាមសាក្សីនៅកន្លែងកើតហេតុបានឲ្យដឹងថា នៅមុនពេលកើតហេតុគេបានឃើញរថយន្តម៉ាកឡង់គ្រីស័រ ឡើងស៊េរីឡិចស៊ីសRX៤៧០ ពណ៌ទឹកប្រាក់ ពាក់ស្លាកលេខភ្នំពេញ2G-4969 បើកបរដោយបុរសម្នាក់ធ្វើដំណើរតាមបណ្តោយផ្លូវវេងស្រេង ក្នុងទិសដៅពីកើតទៅលិចខណៈមកដល់ចំណុចកើតហេតុបានបើកឆ្លងផ្លូវទៅត្បូងបំណងចូលច្រកផ្សារត្រពាំងថ្លឹងពេលមកដល់ពាក់កណ្តាលផ្លូវភ្លាមនោះស្រាប់តែមានរថយន្តម៉ាកកាមរីបាឡែន ពណ៌ស ពាក់ស្លាកលេខភ្នំពេញ2S-7221 បើកបរដោយបុរសម្នាក់និងមិត្តភក្តិម្នាក់ទៀតរួមដំណើរជាមួយ ធ្វើដំណើរក្នុងទិសដៅពីលិចទៅកើតក្នុងល្បឿនយ៉ាងលឿនក៏ជ្រុលបុកចំពីចំហៀងពេញទំហឹងបណ្តាលឲ្យរថយន្តឡិចសីុសខ្ទាតទៅបុកនិងតូបលក់ចាប់ដូររងការខូចខាត ចំណែករថយន្តទាំង២គ្រឿងរងការខូចខាតយ៉ាងដំណំ។

ក្រោយពេលកើតហេតុសមត្ថកិច្ចមូលដ្ឋានបានចុះមកដល់ចំណុចកើតហេតុនិងធ្វើការសម្របសម្រួលដោយភាគីខាងរថយន្តឡង់គ្រីស័រចេញថ្លៃខូចខាតទៅភាគីខាងរថយន្តកាមរីបាឡែនចំនួន៣០០ដូល្លារ និងចេញថ្លៃខូចខាតតូបចំនួន១០០ដូល្លារដើម្បីបញ្ចប់រឿង៕

ដោយ៖ សុខាសែនជ័យ