ខេត្តកណ្តាល៖ ជនសង្ស័យប្រុសស្រី៦នាក់និងវត្ថុតាងថ្នាំញៀនជាច្រើនកញ្ចប់ ត្រូវបានសមត្ថកិច្ចនគរបាលការិយាល័យប្រឆាំងគ្រឿងញៀន នៃស្នងការដ្ឋាននគរបាលខេត្តកណ្តាល សហការជាមួយនគរបាលស្រុកពញាឮ បង្រ្កាបចាប់ខ្លួន កាលពីវេលាម៉ោង១២និង៣០នាទីថ្ងៃត្រង់ទី២៦ ខែធ្នូ ឆ្នាំ២០១៦ នៅភូមិឃ្លាំងស្បែក ឃុំកំពង់លួង ស្រុកពញឮ ។
មន្ត្រីនគរបាលស្រុកពញាឮបានឲ្យដឹងថា ជនសង្ស័យដែលត្រូវបានចាប់ខ្លួន ទី១-ឈ្មោះ ម៉ានគ្រីយ៉ើ ភេទប្រុស អាយុ១៧ឆ្នាំ ជនជាតិខ្មែរឥស្លាម មុខរបរមិនពិតប្រាកដ ទី២-ឈ្មោះ សេង រ៉ូហា្វត ភេទប្រុស អាយុ២០ឆ្នាំ ជនជាតិខ្មែរឥស្លាម មុនរបរមិនពិតប្រាកដ ទី៣-ឈ្មោះ ម៉ាន ផល្លា ភេទប្រុសអាយុ២២ឆ្នាំ ទី៤-ឈ្មោះ ម៉ាន ហាំសះ ភេទប្រុស អាយុ២៧ឆ្នាំ ជនជាតិខ្មែរឥស្លាម មុខរបរបើកបររថយន្ត ទី៥-ឈ្មោះ លី ហ្វីម៉ាន ភេទប្រុស អាយុ២១ឆ្នាំ ជនជាតិខ្មែរឥស្លាម មុខរបរកម្មកររោងចក្រ ។ ជនសង្ស័យទាំង៥នាក់នេះមានទីលំនៅភូមិឃ្លាំងស្បែក ឃុំកំពង់លួង ស្រុកពញឮ និងទី៦-ឈ្មោះ ស៊ុន សុភា ភេទស្រី អាយុ២៣ឆ្នាំ មានទីលំនៅភូមិព្រែកល្វា ឃុំពញាឮ ខេត្តកណ្តាល ។
ប្រភពដដែលបានបន្តថា ក្នុងប្រតិបត្តិការបង្រ្កាបចាប់ខ្លួនជនសង្ស័យខាងលើនេះ សមត្ថកិច្ចដកហូតថ្នាំញៀនប្រភេទមេតំហ្វេតាមីន ហៅម៉ាទឹកកកចំនួន១៧កញ្ចប់ (១កញ្ចប់ធំ ៤កញ្ចប់កណ្តាល ២កញ្ចប់មធ្យម និង១១កញ្ចប់តូច) ,ជញ្ជីងថ្លឹងគ្រឿងញៀនចំនួន២គ្រឿង ,ដាវ១ដើម និងសម្ភារវេចខ្ចប់គ្រឿងញៀនជាច្រើនទៀត ។
មន្ត្រីនគរបាលការិយាល័យប្រឆាំងគ្រឿងញៀនខេត្តកណ្តាលបានឲ្យដឹងថា បន្ទាប់ពីទទួលបានព័ត៌មានថា នៅភូមិឃ្លាំងស្បែក ឃុំកំពង់លួង ស្រុកពញឮ មានក្រុមជនសង្ស័យធ្វើសកម្មភាពជួញដូរគ្រឿងញៀន ទើបសមត្ថកិច្ចនគរបាលស្រុកពញាឮចុះធ្វើការស្រាវជ្រាវ ឈានដល់បង្រ្កាបចាប់ខ្លួនជនសង្ស័យទាំង៦នាក់រួមជាមួយវត្ថុតាងជាក់ស្តែង ដើម្បីកសាងសំណុំរឿងចាត់ការតាមច្បាប់ ៕
ដោយ៖ ស្អាងជ័យ
