ខេត្តព្រះវិហារ ៖ ត្រាក់ទ័រមួយគ្រឿងបើកវ៉ាក់អើជាមួយរថយន្តយីឌុបចតស្ងៀមលើចិញ្ចើមផ្លូវ ក៏បានបួងចង្កូតជ្រុលទៅបុករថយន្តកាមរីបាឡែនមួយគ្រឿងទៀតយ៉ាងពេញទំហឹង បណ្តាលឲ្យអ្នកបើករថយន្តរបួសធ្ងន់បាក់ជើងខាងស្តាំ ។

ហេតុការណ៍គ្រោះថ្នាក់ចរាចរណ៍នេះបានឡើងនៅត្រង់ចំណុចគីឡូម៉ែតលេខ៥៨.៥៩ តាមបណ្ដោយផ្លូវជាតិលេខ ៦២ ក្នុងភូមិសាស្ត្រភូមិអូពោរ ឃុំរមណី ស្រុករវៀង ខេត្តព្រះវិហារ កាលពីវេលាយប់ថ្ងៃទី៣១ ខែធ្នូ ឆ្នាំ២០១៦ ។

សមត្ថកិច្ចបានឲ្យដឹងថា ជនរងគ្រោះមានឈ្មោះ គីម គឹមយ៉េន ភេទប្រុស អាយុ២៦ឆ្នាំ រស់នៅស្រុកកោះសុទិន ខេត្តកំពង់ចាម ។ ចំណែកអ្នកបើកត្រាក់ទ័របង្កហេតុបានរត់គេចខ្លួនបាត់ស្រមោលភ្លាមៗ បន្ទាប់ពីកើតហេតុ ។

អ្នកឃើញកើតហេតុនេះបានឲ្យដឹងថា គេឃើញត្រាក់ទ័រ១គ្រឿង ពណ៌ក្រហម បើកពីជើងទៅត្បូង ។ លុះដល់កន្លែងកើតហតុ ក៏វ៉ាក់អើជាមួយរថយន្ដយីឌុប១គ្រឿង ដែលចតលើញ្ចើមផ្លូវ បានបួងចង្កូតជ្រុលទៅបុករថយន្ត១គ្រឿងទៀត ម៉ាកកាមរីបាឡែន ពណ៌ស ពាក់ស្លាកលេខ ភ្នំពេញ2AF-4111 ទិសដៅបញ្រ្ចាស់គ្នាចំយ៉ាងពេញទំហឹងបានទៅគៀបជាមួយរថយន្តយីឌុប បណ្តាលឲ្យអ្នកបើកបររងរបួសបាក់ជើងខាងស្ដាំ ។

ករណីនេះ សមត្ថកិច្ចបានចុះមកធ្វើការវាស់វែងតាមជំនាញ និងបានបញ្ជូនជនរងគ្រោះទៅមន្ទីរពេទ្យបង្អែកខេត្ត ។ ដោយឡែកមធ្យោបាយពាក់ព័ន្ធបានយកមករក្សាទុក រង់ចាំដោះស្រាយពេលក្រោយបន្តតាមនីតិវិធី ៕ ជាយក្រុង