ខេត្តកំពង់ឆ្នាំង៖ គ្រាប់យុទ្ធភ័ណ្ឌមិនទាន់ផ្ទុះជាង៨កេះត្រូវប្រជាពលរដ្ឋប្រទះឃើញនៅក្នុងដីចំការមួយកន្លែងក្នុងពេលដែលប្រជាពលរដ្ឋចូលរើសគល់ឈើ កាលពីរសៀលថ្ងៃទី១ ខែមករា ឆ្នាំ២០១៧ នៅចំណុចបាវិត ស្ថិតក្នុងភូមិដំណាក់អំពិល ឃុំក្ដុលសែនជ័យ ស្រុកទឹកផុស ខេត្តកំពង់ឆ្នាំង ។

សមត្ថកិច្ចបានឲ្យដឹងថា កាលពីរសៀលថ្ងៃទី១ ខែមករា ឆ្នាំ២០១៧ មានប្រជាពលរដ្ឋ១៧នាក់បានទៅស៊ីឈ្នួលរើសគល់ឈើនៅក្នុងចំការរបស់ម្ចាស់ចំការឈ្មោះ អ៊ិន អាត ក្នុងពេលដែលដើររើសគល់ឈើនោះក៏បានប្រទះឃើញគ្រាប់ដែលមិនទាន់ផ្ទុះចំនួន៨កេះកន្លះ។ ក្រោយពីប្រទះឃើញប្រជាពលរដ្ឋបានប្រាប់ទៅម្ចាស់ចំការ ហើយម្ចាស់ចំការក៏រាយការណ៍ទៅសមត្ថកិច្ចមកពិនិត្យមើលចំពោះគ្រាប់មិនទាន់ផ្ទុះនេះ ។

ក្រោយពីសមត្ថកិច្ចមកពិនិត្យគ្រាប់យុទ្ធភ័ណ្ឌមិនទាន់ផ្ទុះនេះ បានបញ្ជាក់ថា គ្រាប់ជាគ្រាប់ចាស់ដែលសល់នៅជំនាន់សង្រ្គាម ក្នុងចំណោមគ្រាប់មិនទាន់ផ្ទុះទាំង៨កេះនោះ មានចំនួន៦កេះ និងកេះតួចចំនួន២កេះ ជាប្រភេទគ្រាប់ អឹម១៦ (M16) ហើយនៅមានគុណភាពផ្ទុះបាន  និងបានរាយការណ៍មកមជ្ឈមណ្ឌលហ្វឹកហ្វឺនស៊ីម៉ាក់ ដើម្បីយកគ្រាប់យុទ្ធភ័ណ្ឌមិនទាន់ផ្ទុះមករក្សាទុកនៅទីកន្លែងមានសុវត្ថិភាព ៕

ដោយ៖ ចន្ថា